जीतपुरसिमरा गोल्डकप आजदेखि, उद्घाटन खेलमा चितवन र सिरहा भिड्ने

सिमराः जीतपुरसिमरा गोल्डकपको १५औं संस्करण आज (शुक्रबार) देखि सुरु हुँदैछ । सिमरा रंगशालामा दिउँसो ३ बजेपछि उद्घाटन समारोह सुरु हुनेछ ।
प्रतियोगिताको उद्घाटन खेलमा हानामी बिएफसी भरतपुर र सलहेश युवा क्लब सिरहा भिड्नेछन् । जीतपुरसिमरा उपमहानगरपालिकाका नगर प्रमुख राजन पौडेलले प्रतियोगिताको उद्घाटन गर्ने कार्यक्रम छ ।
प्रतियोगितामा साविक विजेता नेपाल पुलिस क्लब, मछिन्द्र फूटबल क्लब, रिगल हेटौंडा रिसोर्ट एन्फा मकवानपुर, फ्रेण्ड्स क्लब, हिमालयन शेर्पाक्लबको सहभागिता रहनेछ । प्रतियोगिताको विजेताले १० लाख र उपविजेताले पाँच लाख नगद प्राप्त गर्नेछ ।
प्रतियोगिताको सर्वोत्कृष्ट खेलाडीले एक थान इलेक्ट्रोनिक्स स्कुटर, सर्वाधिक गोलकर्ता, उत्कृष्ट गोलरक्षक र उत्कृष्ट प्रशिक्षकले जनही २५ हजार प्राप्त गर्नेछन् । उदयीमान खेलाडीलाई १५ प्रदान गरिनेछ भने प्रत्येक खेलको प्लेयर अफ दि म्याच घोषित हुने खेलाडीले १० हजार नगद पाउनेछन् ।
ग्रिन इनर्जी प्रा.लि.ले प्लेयर अफ दि म्याचको पुरस्कार प्रायोजन गर्ने भएको छ ।सर्वोत्कृष्ट खेलाडीलाई भिएक्सएल एजुकेशनले इलेक्ट्रोनिक्स स्कुटर प्रदान गर्नेछ भने विधागततर्फ उत्कृष्ट हुने खेलाडीलाई ग्रेस इन्टरनेशनल, केटिएम कन्सल्टिङ ग्रुप, केएनडी लेबर सप्लायर्सले पुरस्कार राशी उपलब्ध गराउनेछ । उदयीमान खेलाडीलाई हाल अष्ट्रेलियामा रहेका पूर्व राष्ट्रिय खेलाडी रवि पासवानले नगद उपलब्ध गराउनेछन् ।
जीतपुरसिमरा गोल्डकपमा एनसेलको आगमन
जीतपुरसिमरा गोल्डकपमा पहिलो पटक एनसेलको प्रवेश भएको छ । गोल्डकप सफल बनाउन एनसेलले सहयोगीको भूमिकामा उपस्थिती देखाएको हो ।
प्रतियोगिता आयोजक नव जनजागृति युवा क्लबले गोल्डकपमा एनसेलको समेत सहयोग रहेको बताएको छ । एनसेलले गरेको सहयोग रकम भने आयोजकले खुलाएको छैन ।
पहिलो पटक सहभागिता जनाएको एनसेलको उपस्थितीलाई आयोजकले सकारात्मक लिएको छ । एनसेलको सहयोग निरन्रतर गराउन सके प्रतियोगिताको बलियो आधार तयार हुने आयोजकको भनाई छ ।
एनसेलमा आवद्ध सिमराका युवा सुभाष गुभाजुले आयोजकसंग समन्वय गरिरहेका छन् । उनकै पहलमा आयोजक एनसेलसम्म पुगेको हो । आयोजकको प्रस्तावमा एनसेल पनि सकारात्मक बनेको हो ।
टिकट काट्दा एनसेलको सिम सित्तैमा
आयोजकका अनुसार टिकट काट्ने दर्शकले सिम निःशुल्क पाउनेछन् । रंगशाला प्रवेशको मुख्य द्धारमा रहेको एनसेलको काउन्टरबाट टिकट काट्ने दर्शकले सिम लिन सक्नेछन् ।
टिकट काट्नेलाई उपहार नै उपहार
यसपटक टिकट काटेर खेल हेर्ने दर्शकले उपहार नै उपहार पाउने भएका छन् । टिकट काटेका दर्शकमध्ये एक जनालाई गोलाप्रथाबाट सुरक्षा मोबाइलको तर्फबाट स्मार्ट घडी, हिमालयन कफि शपको तर्फबाट दुई हजार बराबरको नाङ्लो प्लाटर, ग्रेस इन्टरनेशनलको तर्फबाट छाता, ब्याग प्रदान गरिनेछ ।
यसैगरी ए.के. सप्लायर्सले दुई जना दर्शकलाई सिसिटिभी क्यामरा प्रदान गर्नेछ ।
