जीतपुरसिमरा गोल्डकपः हानामी बिएफसी भरतपुरको बिजयी सुरुवात
सिमराः चितवनको हानामी बिएफसी भरतपुरले जीतपुरसिमरा गोल्डकपको १५औं संस्करणमा बिजयी सुरुवात गरेको छ ।
सिमरा रंगशालामा शुक्रबार राती सम्पन्न उद्घाटन खेलमा सलहेश युवा क्लब सिरहालाई २–१ निराश पार्दै चितवनले जित हात पारेको हो । जितसंगै चितवन प्रतियोगिताको सेमिफाइनलमा प्रवेश गरेको छ ।
आठौं गोलबजार मेयर गोल्डकप जितेर सिमरा आएको सलहेशका लागि जीतपुरसिमरा गोल्डकपको यात्रा सुखद् हुन सकेन । चितवनलाई अन्तिम चारमा लैजाने क्रममा विष्णु योञ्जन र राज भुषालले समान एक/एक गोल गरे । सिरहाका लागि सुशील राईले एक गोल फर्काए ।
पहिलो हाफ गोलरहित बराबरी खेलेको चितवनले खेलको ५३औं मिनेटमा विष्णुको गोलबाट अग्रता लियो । जंगलमा लागेको डढेलोका कारण धुवाँले प्रभावित बनेको खेलमा सलहेशले ८०औं मिनेटमा बराबरी गोल फर्कायो । सलहेशका लागि सुशील राईले गोल गरे ।
त्यसको पाँच मिनेट वित्न नपाउँदै अर्को गोल थप्दै चितवनले जित सुनिश्चित गरेको थियो । चितवनका लागि राज भुषालले खेलको ८५औं मिनेटमा दोस्रो गोल गरेका थिए । भुषाल प्लेयर अफ दि म्याच समेत घोषित भए ।
भुषालले ग्रिन इनर्जी प्रालिद्धारा प्रायोजित १० हजार राशीको प्लेयर अफ दि म्याचको पुरस्कार प्राप्त गरे । जीतपुरसिमरा उपमहानगरपालिकाका नगर प्रमुख राजन पौडेल र ग्रिन ईनर्जीका संचालक शैलेश शाह ठकुरीले पुरस्कार वितरण गरेका थिए ।
प्रतियोगिता अन्तर्गत शनिबार आयोजक नव जनजागृति युवा क्लब र रिगल हेटौंडा रिसोर्ट एन्फा मकवानपुरबीच खेल हुनेछ ।
चैत २९ गतेसम्म आयोजना हुने प्रतियोगितामा साविक विजेता नेपाल पुलिस क्लबसहित आठ टिमको सहभागिता रहेको छ । प्रतियोगिताको विजेताले १० लाख र उपविजेताले पाँच लाख प्राप्त गर्नेछ ।
जीतपुरसिमरा उपमहानगरपालिकाको मुख्य सहयोगमा आयोजित प्रतियोगितामा एनसेल, सूर्य नेपाल प्रालि, हुलास स्टील, नेपोभिट टायल्स, कोकाकोला, भिएक्सएल एजुकेशन, ग्रिन इनर्जी प्रा.लि., युआर अटोमेटिक लण्ड्री, सुरक्षा मोबाइल, केएनडी लेबर सप्लायर्स, ग्रेस इन्टरनेशन, केटिएम कन्सल्टिङ ग्रुप, हिमालयन कफी सप, एके सप्तालर्य, होटल तथा पर्यटन व्यवसायी संघ, सगरमाथा इन्स्योरेन्स, स्टार सिटी अस्पताल, सुसप्त मेडिकललगायत विभिन्न व्यावसायिक संघसंस्थाले सहयोग गरेका छन् ।
