जीतपुरसिमरा गोल्डकपः आज आयोजक र मकवानपुर भिड्दै
सिमराः जीतपुरसिमरा गोल्डकपको १५औं संस्करण अन्तर्गत आज (शनिबार) हुने खेलमा आयोजक नव जनजागृति युवा क्लब र रिगल हेटौंडा रिसोर्ट एन्फा मकवानपुरबीच खेल हुँदैछ ।
दुई टिमबीचको खेल साँझ ६ बजे सिमरा रंगशालामा सुरु हुनेछ । यसअघि शुक्रबार भएको उद्घाटन खेलमा हानामी बिएफसी भरतपुर बिजयी भएको छ । भरतपुरले सलहेश युवा क्लब सिरहालाई २–१ ले पराजित गरेको हो ।
प्रतियोगितामा साविक विजेता नेपाल पुलिस क्लब, मछिन्द्र फूटबल क्लब, फ्रेण्ड्स क्लब, हिमालयन शेर्पाक्लबसहित आठ टिमको सहभागिता रहेको छ । प्रतियोगिताको विजेताले १० लाख र उपविजेताले पाँच लाख नगद प्राप्त गर्नेछ ।
प्रतियोगिताको सर्वोत्कृष्ट खेलाडीले एक थान इलेक्ट्रोनिक्स स्कुटर, सर्वाधिक गोलकर्ता, उत्कृष्ट गोलरक्षक र उत्कृष्ट प्रशिक्षकले जनही २५ हजार प्राप्त गर्नेछन् । उदयीमान खेलाडीलाई १५ प्रदान गरिनेछ भने प्रत्येक खेलको प्लेयर अफ दि म्याच घोषित हुने खेलाडीले १० हजार नगद पाउनेछन् ।
ग्रिन इनर्जी प्रा.लि.ले प्लेयर अफ दि म्याचको पुरस्कार प्रायोजन गर्ने भएको छ । सर्वोत्कृष्ट खेलाडीलाई भिएक्सएल एजुकेशनले इलेक्ट्रोनिक्स स्कुटर प्रदान गर्नेछ भने विधागततर्फ उत्कृष्ट हुने खेलाडीलाई ग्रेस इन्टरनेशनल, केटिएम कन्सल्टिङ ग्रुप, केएनडी लेबर सप्लायर्सले पुरस्कार राशी उपलब्ध गराउनेछ । उदयीमान खेलाडीलाई हाल अष्ट्रेलियामा रहेका पूर्व राष्ट्रिय खेलाडी रवि पासवानले नगद उपलब्ध गराउनेछन् ।
जीतपुरसिमरा उपमहानगरपालिकाको मुख्य सहयोगमा आयोजित प्रतियोगितामा यस वर्षदेखि एनसेन पनि जोडिएको छ । एनसेलले टिकट काट्ने दर्शकलाई निःशुल्क सिम उपलब्ध गराउने भएको छ ।
