सानो पाइला सहकारी ठगी प्रकरणः रवि लामछिानेसहित ४१ जनासंग दुई अर्ब ३० करोड बिगो दाबी
वीरगन्जः पूर्पक्षका लागि भैरहवास्थित कारागारमा रहेका रवि लामिछानेसहित ४१ जनालाई प्रतिवादी बनाउँदै पर्सा प्रहरीले सानो पाइला सहकारीको फाइल सरकारी वकिलको कार्यालयमा पठाएको छ ।
झण्डै पाँच महिनाको अनुसन्धान सकेर पर्सा प्रहरीले सहकारी ठगी प्रकरणको प्रतिवेदन सरकारी वकिलको कार्यालयमा पठाएको हो । सहकारी ठगी र सङ्गठित अपराधको अनुसन्धान सकेर प्रतिवेदन सरकारी वकिलको कार्यालयमा पठाएको पर्साका प्रहरी प्रवक्ता किशोर लम्सालले जानकारी दिएका छन् ।
प्रहरीले साइनो पाईला सहकारी ठगी प्रकरणमा ३० व्यक्ति, तीन सहकारी र ११ वटा कम्पनीविरुद्ध मुद्धा चलाउने तयारी गरेको छ । जसमा पूर्व गृहमन्त्री लामिछाने, पूर्व डिआईजी छविलाल जोशी, गोर्खा मिडिया प्रालिका अध्यक्ष गितेन्द्रबाबु (जीबी) राई, कुमार रम्तेललगायतका छन् ।
प्रहरीले ४१ आरोपितविरुद्ध दुई अर्व ३० करोड १४ लाख बिगो दावी गरेको छ । जसमध्ये कुमार रम्तेलसंग १५ करोड ५३ लाख, जिवि राई संग १० करोड ८१ लाख, लामिछानेसंग पाँच करोड ७४ लाख, जोशीसंग तीन करोड २४ लाख बिगो दाबी गरिएको छ । राई फरार छन् भने लामिछाने, जोशी र रम्तेल कारागारमा छन् ।
सानो पाइला सहकारीका चार सय ३८ बचतकर्ताले आफूहरुको रकम अपचलन भएको भन्दै विभिन्न मितिमा पर्सा प्रहरी कार्यालयमा उजुरी दिएका थिए । अनुसन्धानमा सानो पाइला सहकारीबाट सूर्यदर्शन सहकारीमा एक करोड १० लाख र स्वर्णलक्ष्मी सहकारीमा एक अर्ब १५ करोड रुपैयाँ सारिएको देखिएको छ ।
बचतकर्ताको उजुरीमा अनुसन्धान थालेको प्रहरीले मंसिर २५ गते लामिछानेसंग जिल्ला सरकारी वकिलको कार्यालयमा ल्याएर बयान समेत लिएको थियो । प्रहरीले लामिछानेविरुद्धको सम्पति शुद्धिकरण मुद्धामा भने अनुसन्धान गरिरहेको छ ।
