खत्रीलाई उपमहानगरपालिकाको प्रवक्ताको जिम्मेवारी
सिमराः जीतपुरसिमरा उपमहानगरपालिका वडा नं. ४ का अध्यक्ष भोजबहादुर खत्री (ईश्वर) लाई उपमहानगरपालिकाको प्रवक्ता तोकिएको छ । नगर प्रमुख राजन पौडेलले सोमबार खत्रीलाई प्रवक्ता तोकेका हुन् ।
उपमहानगरपालिकाको नगर कार्यपालिका (कार्यसम्पादन) नियमावली २०७५ को नियम १७ को उपनियम (१) बमोजिम नगर प्रमुखले खत्रीलाई प्रवक्ताको जिम्मेवारी दिएका हुन् । नियमावलीमा नगर प्रमुखले कार्यपालिका सदस्यमध्ये कुनै एक जनालाई प्रवक्ता तोक्न सक्ने व्यवस्था छ ।
नगर प्रमुखको तोकेको प्रवक्ताले नगर प्रमुख, कार्यपालिका, नगर सभाको तर्फबाट जारी गर्नुपर्ने सार्वजनिक महत्वका सूचना, वक्तब्य र विज्ञप्ती जारी गर्ने काम गर्नुपर्नेछ । खत्री नेकपा माओवादी केन्द्रबाट निर्वाचित वडाध्यक्ष हुन् ।
