त्रिशुलीमा ट्रक खस्दा सिमराका न्यौपानेको अवस्था अज्ञात
सिमराः त्रिशली नदीमा खसेको ट्रकसहित जीतपुरसिमरा २ का अनन्त न्यौपानेको अवस्था अझै अज्ञात रहेको छ । धादिङको मझिमटारमा विहिवार विहान करिब ३ बजे ट्रक खसेको हो ।
सिमराबाट काठमाडौ जादै गरेको ट्रक कल्भर्टमा ठोक्किएर अनियन्त्रित हुँदै त्रिशुली नदीमा खसेको थियो । कल्भर्टमा ठोक्किएर गाडी अनियन्त्रित भएपछि सहचालकले हाम्फालेर ज्यान जोगाएका थिए ।
ट्रक खसेलगत्तै सहचालकले प्रहरी कार्यालय पुगेर घटनाको बारेमा जानकारी गराएका थिए । घटनाको जानकारी पाएलगत्तै प्रहरी घटनास्थल पुगेको थियो ।
यता घटनाको जानकारी पाएपछि न्यौपानेको परिवारसहित सिमराका स्थानीयको टोली मझिमटार पुगेको थियो । घटनास्थल पुगेका अनन्तका दाई नवराज न्यौपानेले विहिवार रातीसम्म अवस्था अज्ञात रहेको बताए ।
‘घटनास्थलमा ट्रक खस्दा सडक छेउमा घासहरु मडारिएको देखिन्छ । त्यसबाहेक ठुलो नदी र छालमा ट्रक देख्न सकिएको छैन्’ न्यौपानेले भने ‘शुक्रवार गोताखोरको सहयोगमा खोजी गर्ने तयारी गरेका छौं ।’
