पथलैयामा मिस्टर डी र गायिका शोभा त्रिपाठी आउने
सिमराः श्रीकृष्ण जन्माष्टमीको अवसर पारेर पथलैयामा आयोजना गर्न लागिएको सांगीतिक कार्यक्रममा चर्चित र्यापर मिस्टर डी (सन्दिप विष्ट) र गायिका शोभा त्रिपाठी आउने भएका छन् । भदौ ३ गते कृष्ण मन्दिर प्रांगणमा आयोजना हुने कार्यक्रममा प्रस्तुति दिन मिस्टर डी र त्रिपाठी आउन लागेका हुन् ।
स्थानीय सांगीतिक समुह योङ नीति ब्याण्डले आयोजनामा गर्न लागेको कार्यक्रममा कल्याण आले, विकेड भिक्टिम्स नेपाल, आयोजक योङ नीति र पथलैया ग्रुपको समेत प्रस्तुती रहनेछ ।
गोर्खा ब्रअरीको मुख्य प्रायोजनमा हुने कार्यक्रमलाई यु आर ट्रेड एण्ड लन्ड्रीले सहप्रायोजन गर्ने भएको छ । कार्यक्रम सफल बनाउन स्थानीय संघसंस्थाले समेत सहयोग गर्ने गरेका छन् ।
श्री कृष्ण जन्माष्टमीको अवसर पारेर पथलैयामा प्रत्येक वर्ष सांगीतिक कार्यक्रमको आयोजना हुने गरेको छ । पछिल्लो दुई वर्ष कोरोनाको कारण कार्यक्रम हुन सकेको थिएन । कृष्ण जन्माष्टमी पर्वलाई पथलैयामा जात्राको रुपमा मनाउने गरिएको छ ।
नेवारी समुदायले जनैपूर्णिमाको दिन पथलैयामा लाखे निकाल्ने र कृष्ण जन्माष्टमीको दिन राती १२ बजे समापन गर्ने गरिएको छ । मध्यरात १२ बजे कृष्णले जन्म लिएर लाखेको वध गरेपछि लाखे कार्यक्रम सम्पन्न हुने र अर्को दिन रथ यात्रा निकाल्ने गरिएको छ ।
