नक्कली नेपाली नोटसहित एक पक्राउ, ८२ हजार पाँच सय बरामद
सिमराः बारा प्रहरीले नक्कली नेपाली नोटसहित एक जनालाई पक्राउ गरेको छ । बाराको सिम्रौनगढ नगरपालिका वडा नं. ५ कनकपुरबाट प्रहरीले ८२ हजार पाँच सय नक्कली नोटसहित जगदेव महतो नुनियालाई पक्राउ गरेको हो ।
प्रहरीले महतोको कनकपुरस्थित घरमा लुकाएर राखेको अवस्थामा एक हजारको ८० थान र पाँच सय तीन थान नक्कली नोट बरामद गरेको हो । महतोले आफू सुत्ने खाटमा माछा मार्ने जाली भित्र उक्त नोट लुकाएर राखेको अवस्थामा फेला गरेको बाराका प्रहरी उपरीक्षक होबिन्द्र बोगटीले बताए ।
प्रहरीले पत्रकार सम्मेलन गरी महतोलाई नक्कली नोटसहित सार्वजनिक गरेको छ । नक्कली नोटको कारोवारमा अन्यको पनि संलग्नता हुन सक्ने देखिएकाले महतोलाई नियन्त्रणमा लिई थप अनुसन्धान भईरहेको प्रहरी उपरीक्षक बोगटीले जानकारी दिए ।
