बारामा अदालतबाट सजाय पाएका ३३२ जना एकैदिनमा पक्राउ, ३६ जना कारागार चलान
कलैयाः जिल्ला अदालत बाराबाट विभिन्न मुद्धामा कैद तथा जरिवाना तोकिए पनि फरार रहदै आएका तीन सय ३२ जनालाई बारा प्रहरीले एकैदिनमा पक्राउ गरेको छ ।
जिल्ला प्रहरी कार्यालय बाराले फरारको सूचिमा रहेका उनिहरुलाई सोमबार जिल्लाको विभिन्न स्थानबाट पक्राउ गरी अदालतको फैसला कार्यान्यवनको प्रक्रिया अघि बढाएको हो ।
पक्राउ पर्नेमा सामान्य जरिवानादेखि हातहतियार, बैंकिङ कसुरलगायतको मुद्धामा कैद सजाय सुनाइएका प्रतिवादी समेत छन् । बाराका प्रहरी प्रवक्ता राजेश थापाले अधिकतम साढे ६ वर्षको कैद सजाय सुनाइएका फरार व्यक्तिदेखि सामान्य जरिवाना तोकिएका व्यक्तिलाई पक्राउ गरी अदालतमा पेश गरेको जानकारी दिए ।
थापाका अनुसार पक्राउ पर्नेमा ६ वर्ष पाँच महिना १० दिन कैद सजाय तोकिएका कलैया उपमहानगरपालिका १ का बिजय दास, बैंकिङ कसुर मुद्धामा सात लाख जरिवाना तोकिएका पचरौता २ का एजाजुल हक अंसारी, हातहतियार मुद्धामा कैद सजाय पाएका निजगढ १ का बासु चौधरीलगायत छन् ।
पक्राउ परेकामध्ये ३६ जनालाई वीरगन्जस्थित कारागार चलान गरिएको र अन्यले तोकिएको जरिवाना तिरेर मुक्त भएको थापाले बताए । अदालतको फैसला कार्यान्यवन गराउन र सजाय पाएका व्यक्तिलाई कानुनी दायरामा ल्याउन अभियान थालिएको बताएका छन् ।
