अन्तर विद्यालय खेलकुद प्रतियोगितामा पथलैया र औराह प्रथम
सिमराः साताव्यापीरुपमा स्वर्ण जयन्ती उत्सव मनाइरहेको पथलैयास्थित नेपाल राष्ट्रिय माध्यमिक विद्यालयले आयोजना गरेको खेलकुद प्रतियोगिता अन्तर्गत सोमबार दुई वटा खेल सम्पन्न भएको छ ।
स्थापनाको ५०औं वार्षिकोत्सवका अवसरमा आयोजित विभिन्न खेलकुद प्रतियोगिता अन्तर्गत दोस्रो दिन नगर स्तरीय अन्तर विद्यालय भलिबल र हाजिरीजवाफ प्रतियोगिता सम्पन्न भएको हो ।
विद्यालय परिसरमा सम्पन्न भलिबल प्रतियोगितामा जीतपुरसिमरा ४ औराहस्थित नेपाल राष्ट्रिय माध्यमिक विद्यालय प्रथम भएको छ भने आयोजक विद्यालय दोस्रो भएको छ ।
यसैगरी हाजिरीजवाफ प्रतियोगितामा आयोजक विद्यालय प्रथम, जीतपुरसिमरा १६ स्थित जनता माध्यमिक विद्यालय द्धितीय र पथलैयास्थित होली गार्डेन इङलिस् स्कुल तृतीय भएका छन् ।
बिजेता खेलाडीलाई विद्यालय व्यवस्थापन समितिका अध्यक्ष कल्याण आलेमगर, प्रध्यानाध्यापक शम्भु मण्डल, खेलकुद उपसमितिका संयोजक राजकुमार लामालगायतले पुरस्कार वितरण गरेका थिए ।
वार्षिकोत्सवका अवसरमा विद्यालयले माघ २२ गतेदेखि २८ गतेसम्म विभिन्न कार्यक्रमको आयोजना गर्न लागेको छ । प्रध्यानाध्यापक मण्डलका अनुसार स्तम्भ निर्माण, स्मारिका प्रकाशन, अक्षय कोष घोषणा, अभिभावक शिक्षा कार्यक्रम, खेलकुद प्रतियोगितासहित २८ गते विशेष समारोह आयोजना हुनेछ ।
