विद्यालयको वार्षिकोत्सवका अवसरमा फूटबल र क्रिकेट प्रतियोगिता
सिमराः पथलैयास्थित नेपाल राष्ट्रिय माध्यमिक विद्यालयको आयोजनामा मंगलवार अन्तर विद्यालय फूटबल र क्रिकेट प्रतियोगिता सम्पन्न भएको छ । आफ्नो ५०औं वार्षिकोत्सवका अवसरमा विद्यालयले साताव्यापी कार्यक्रम अन्तर्गत खेलकुद प्रतियोगिता आयोजना गरेको हो ।
पथलैयामा शुरु भएको फूटबल प्रतियोगिता अन्तर्गत एकै दिनमा चार खेल सम्पन्न भएका छन् । आठ वटा विद्यालयको सहभागिता रहेको प्रतियोगितामा आयोजक विद्यालय, नेपाल राष्ट्रिय माध्यमिक विद्यालय डगाहा, नेपाल राष्ट्रिय माध्यमिक विद्यालय औराह र नेपाल राष्ट्रिय माध्यमिक विद्यालय सिमरा विजयी भएका छन् ।
उद्घाटन खेलमा पथलैयाले नेपाल राष्ट्रिय माध्यमिक विद्यालय रजघट्टालाई पराजित गरेको हो । यसैगरी अन्य खेलमा डगाहाले नेपाल राष्ट्रिय माध्यमिक विद्यालय फत्तेपुर, औराहले नेपाल राष्ट्रिय माध्यमिक विद्यालय डुमरवाना र सिमराले नेपाल राष्ट्रिय माध्यमिक विद्यालय अमलेखगंजलाई पराजित गरेको शिक्षक रुवन थापाले जानकारी दिएका छन् ।
बिजेता चार टिम सेमिफाईनल प्रवेश गरेका छन् । फाइनल प्रवेशका लागी चार टिमबीच बुधवार प्रतिस्पर्धा हुनेछ ।
यसैगरी अन्तर विद्यालय क्रिकेट प्रतियोगिता अन्तर्गत भएको खेलमा आयोजक विद्यालय बिजयी भएको छ । आयोजक विद्यालयले नेपाल राष्ट्रिय माध्यमिक विद्यालय सिमरालाई पराजित गरेको हो ।
यसअघि खेलकुद प्रतियोगिताको उद्घाटन जीतपुरसिमरा उपमहानगरपालिकाका नगर उपप्रमुख भोलाप्रसाद अधिकारीले गरेका थिए । कार्यक्रममा जीतपुसिमरा उपमहानगरपालिका वडा नं. १ का अध्यक्ष हिराबहादुर गुरुङ, वडा नं. २२ का अध्यक्ष शेखर काजी रुम्बा, विद्यालय व्यवस्थापन समितिका अध्यक्ष कल्याण आलेमगर, प्रध्यानाध्यापक शम्भु मण्डललगायतको उपस्थिती रहेको थियो ।
विद्यालयले माघ २२ गतेदेखि २८ गतेसम्म वार्षिकोत्सव मनाउदैछ ।
