जीतपुरसिमरा ७ भित्रका विद्यालयमा अध्ययनरत विद्यार्थीलाई आत्मरक्षा तालीम
सिमराः जीतपुरसिमरा ७ स्थित निजी तथा सामुदायिक विद्यालयका विद्यार्थीलाई लक्षित गर्दै नेपाल सितोरियो कराते जितपुर डोजोले आत्मरक्षा तालिम सुरु गरेको छ ।
वडा भित्र रहेका सात वटा निजी र एउटा सामुदायिक विद्यालयका विद्यार्थीका लागि डोजोले तालिमको आयोजना गरेको हो । एउटा विद्यालयमा तीन दिनसम्म संचालन हुने तालिममा विद्यार्थीलाई आत्मरक्षाका विषयमा प्रशिक्षण दिइने डोजो प्रमुख मनोजकुमार साहले जानकारी दिएका छन् ।
हाल शहिद स्मारक बोर्डिङ स्कुलमा प्रशक्षिण जारी रहेको र अन्य विद्यालयमा क्रमश आयोजना हुँदै जाने साहले बताए । उनका अनुसार होली राज, जेपिएस, एभरग्रिन, मदर्शा र फकिरा गिरी राजेश्वर गिरी विद्यालयमा प्रशिक्षण आयोजना हुनेछ ।
आफ्नो सुरक्षाको विषयमा प्रशिक्षण दिने र खेलकुदमा विद्यार्थीलाई आकर्षित गर्नका लागि तालिमको आयोजना गरिएको साहले बताए ।
