नेपाल पुलिस क्लबलाई स्तब्ध पार्दै नव जनजागृति राजर्षि जनक कपको क्वाटरफाइनलमा
सिमराः विभागीय टिम नेपाल पुलिस क्लबलाई पराजित गर्दै सिमराको नव जनजागृति युवा क्लब सातौं राजर्षि जनक कप फूटबल प्रतियोगिताको क्वाटरफाइनलमा प्रवेश गरेको छ ।
सर्लाहीको कर्मैयास्थित सन्तोष श्रेष्ठ स्मृति खेल मैदानमा शुक्रवार भएको खेलमा पुलिस क्लबलाई सडन डेथमा पराजित गर्दै नव जनजागृति अन्तिम आठमा प्रवेश गरेको हो ।
विभागिय टिमविरुद्ध जित निकाल्ने क्रममा उत्कृष्ट खेल पस्केको नव जनजागृतिले सडन डेथसम्म संघर्ष गर्नुपरेको थियो । निर्धारित समयमा दुवै टिमले गोलरहित बराबरी खेलेपछि खेल टाइब्रेकमा पुगेको थियो ।
टाइब्रेकरमा पनि ५-५ गोलको बराबरी भएपछि नतिजा सडन डेथबाट निस्किएको हो । नव जनजागृति युवा क्लबका गोलरक्षक रोहन मगर खेलको म्यान अफ दि म्याच घोषित भएका छन् । उनले १० हजार नगर प्राप्त गरेका छन् ।
बाग्मती युवा क्लब र बाग्मती नगर खेलकुद विकास समितिको आयोजना तथा हरिवन नगरपालिकाको सहआयोजनामा जारी प्रतियोगिताको विजेताले १० लाख र उपविजेताले पाँच लाख प्राप्त गर्नेछ । प्रतियोगितामा नेपाल र भारतका १२ टिमको सहभागिता रहेको छ ।
