कोल्हबीमा चेरवन्त गोल्डकप सुरु, महोत्तरीको बिजयी सुरुवात
सिमराः महोत्तरीले बाराको कोल्हबीमा सुरु भएको प्रथम चेरवन्त गोल्डकप फूटबल प्रतियोगितामा बिजयी सुरुवात गरेको छ । महोत्तरीले उद्घाटन खेलमा सिमराको नव जनजागृति युवा क्लबलाई १–० गोलले पराजित गरेको हो ।
महोत्तरीको जितमा राजिव राखलले खेलको ३७औं मिनेटमा निर्णायक गोल गरेका थिए । प्रतियोगिता अन्तर्गत आइतवार बारा ११ र कठार ११ युवा क्लब चितवनबीच खेल हुनेछ ।
श्री मानसी बाबा युवा क्लबको आयोजनामा सुरु भएको प्रतियोगिताको उद्घाटन कोल्हबी नगरपालिकाका नगर प्रमुख रामप्रसाद चौधरीले गरेका थिए । उद्घाटन कार्यक्रममा उपप्रमुख लक्ष्मीकुमारी चौधरी, वडा नं. ३ का अध्यक्ष किसुनदयाल चौधरी, १० का वडाध्यक्ष कुन्जबिहारी चौधरी, ११ का वडाध्यक्ष नन्दकिशोर चौधरीलगायतको उपस्थिती रहेको थियो । उद्घाटन समारोह आयोजक क्लबका अध्यक्ष निराजन चौधरीको अध्यक्षतामा सम्पन्न भएको थियो ।
फाल्गुन २० गतेसम्म आयोजना हुने प्रतियोगितामा नव जनजागृति युवा क्लब सिमरा, बारा ११, महोत्तरी, कठार युवा क्लब चितवन, नमुना जन उत्थान युवा क्लब सिन्धुली, हरिवन युवा क्लब सर्लाही, हेटौडा फूटबल एकेडेमी मकवानपुर र आयोजक क्लबको सहभागिता रहनेछ । प्रतियोगिताको विजेताले एक लाख र उपविजेताले पचास हजार नगद प्राप्त गर्नेछन् ।
