पत्रकार गुप्तामाथी हातपात र दुर्व्यवहार
सिमराः प्रेस चौतारी नेपाल बाराका जिल्ला कार्यसमिति सदस्य एवम् एसएलएफ खबरका संचालक रोशन गुप्तामाथी बिहिवार जीतपुरसिमरा उपमहानगरपालिका वडा नं. ५ को कार्यालय अगाडी दुर्व्यवहार र हातपात भएको छ ।
समाचार संकलनका लागी पुगेका गुप्तालाई केही व्यक्तीले दुर्व्यवहार र हातपात गरेका हुन् । सडक ढलान योजनाको भुक्तानीको विषयलाई लिएर समाचार संकलन गर्न पुगेका गुप्तामाथी घनश्याम चौधरीसहित केही व्यक्तिले दुर्व्यवहार गरेका हुन् ।
गुप्तामाथी हातपात गर्दै उनको मोबाइल समेत फुटाइएको छ । गुप्तामाथी हातपात हुन थालेपछि स्थानीयले छुट्याएका थिए । आफूमाथी हातपात भएपछि गुप्ताले दोषीमाथी कडाभन्दा कडा कारवाहीको माग गरेका छन् ।
यसैगरी प्रेस चौतारी नेपाल बाराले बिहिवार विज्ञप्ति जारी गरी संचारकर्मी गुप्तामाथी हातपात र दुर्व्यवहार गर्नेमाथी कारवाहीको माग गरेको छ । समाचार संकलन गरिरहेकै बेला गुप्तामाथी हातपात हुनु दुःखद् रहेको जनाउदै चौतारी बाराले घटनाको छानविन गरी दोषीउपर कारवाहीको माग गरेको हो ।
