मकवानपुरले उचाल्यो हरपुर क्रिकेट च्याम्पियन्स ट्रफी
सिमराः मकवानपुर क्रिकेट एशोसिएशनले जीतपुरसिमरा तेस्रो हरपुर क्रिकेट च्याम्पियन्स ट्रफीको उपाधी जितेको छ । जीतपुरसिमरा २४ स्थित हरपुर क्रिकेट मैदानमा शनिवार भएको फाइनल खेलमा कलैया क्रिकेट क्लबलाई १२ रनले पराजित गर्दै मकवानपुरले उपाधी जितेको हो ।
टस जितेर पहिले ब्याटिङ गरेको मकवानपुरले २० ओभरमा ९ विकेट गुमाउदै एक सय २० रन जोडेको थियो । जवाफी ब्याटिङमा उत्रिएको कलैया एक सय आठ रनमै समेटियो । कलैयाले १९.३ ओभरमा आफ्नो सबै विकेट गुमाएको थियो ।
उपाधीसंगै मकवानपुरले ५० हजार नगद प्राप्त गरेको छ भने कलैयाले ३० हजार हात पारेको छ । प्रतियोगिताको सर्वोत्कृष्ट खेलाडी बाराका अरनिको यादव घोषित भएका छन् । उनले पाँच हजार नगद प्राप्त गरेका छन् । यसैगरी प्रतियोगिताको उत्कृष्ट ब्याट्सम्यान मकवानपुरका शुभ कंसकार, उत्कृष्ट बलर रौतहट एस पटेल, उदयाीमान खेलाडी बाराका मन्नु हवारी घोषित भएका छन् ।
विजेता तथा उपविजेता खेलाडीलाई मधेस प्रदेशसभा सदस्य देवनाराण चौधरी, जीतपुरसिमरा उपमहानगरपालिकाका नगर उपप्रमुख भोलाप्रसाद अधिकारीलगायतले पुरस्कार वितरण गरेका थिए । जीतपुरसिमरा उपमहानगरपालिकाको कार्यालय र वडा नं. २४ को कार्यालयको सहयोगमा प्रतियोगिता आयोजना गरिएको हो ।
