परिक्षा दिएर घर फर्कदै गरेका विद्यार्थीको मोटरसाइकल दुर्घटनामा मृत्यु
सिमराः स्नातक तह तेस्रो वर्षको परिक्षा दिएर सिमराबाट घर फर्कदै गरेका पर्साका एक विद्यार्थीको मोटरसाइकल दुर्घटनामा मृत्यु भएको छ । दुर्घटनामा अर्का एक विद्यार्थी घाईते भएका छन् ।
पथलैया–वीरगन्ज व्यापारिक मार्ग अन्तर्गत भलुही चोकमा मोटरसाइकल दुर्घटना हुँदा पर्सा बहुदरमाई ९ का करिब २३ वर्षीय बिजय शर्माको मृत्यु भएको हो । उनि ठाकुरराम बहुमुखी क्याम्पसका छात्र हुन् ।
दुर्घटनामा मोटरसाइकल चालक पोखरिया १ का करिब २३ वर्षीय अर्जुन सहनी घाईते भएका छन् । सहनीको बयोधा अस्पतालमा उपचार भईरहेको छ ।
स्नातक तह तेस्रो वर्षको परिक्षा सोमबारदेखि सुरु भएको हो । सिमरा कलेजमा रहेको परिक्षा केन्द्रमा ‘बिजेनश ल’ विषयको परिक्षा दिएर शर्मा घर फर्कदै गरेका थिए ।
दुर्घटनामा शर्माको निधन भएपछि वीरगन्जमा विद्यार्थीले प्रदर्शन गरेका छन् । परिक्षा केन्द्र टाढा राखिएको भन्दै विद्यार्थीले विरोध जनाएका हुन् ।
