वीरगन्ज गोल्डकपः पाहुना टोलीमाथि पुलिसको फराकिलो जीत
सिमराः पाहुना टोली क्लाईभ हाउस दम दम फूटबल क्लब कोलकातालाई फराकिलो गोलअन्तरले पराजित गर्दै विभागिय टिम नेपाल पुलिस क्लब प्रथम वीरगन्ज गोल्डकपको सेमिफाइनलमा प्रवेश गरेको छ ।
आदर्शनगर रंगशालामा सोमबार भएको तेस्रो क्वाटरफाइनल खेलमा कोलकातालाई ७-१ ले पन्छाउदै पुलिसले अन्तिम चारको यात्रा तय गरेको हो । पुलिसको जितमा प्रताप गुरुङ एक्लैले पाँच गोल गरे भने प्रविण थापा र विवेक सन्तोषीले समान एक/एक गोल गरेका छन् । कोलकाताका लागि अमन मुन्सीले एक गोल फर्काए ।
निर्धारित खेलको पहिलो हाफमा पाँच गोल गरेको पुलिसले दोस्रो हाफमा थप दुई गोल थप्दै सहज जीत हात हात पारेको हो । खेलमा पाँच गोल गरेका प्रताप म्यान अफ दि म्याच घोषित भए । उनले १० हजार नगद हात पारे । गुरुङलाई प्रतियोगिता आयोजक भेट्रान्स सिटी क्लबका उपाध्यक्ष सागर शमशेर राणाले पुरस्कार वितरण गरेका थिए ।
पुलिसले अब फाइनल प्रवेशका लागि बुधवार आयोजकसंग प्रतिस्पर्धा गर्नेछ । भारतको एफसीआई नर्थ जोन नोयडा फूटबल क्लबलाई टाइब्रेकरमा ३-१ ले स्तब्ध पार्दै आयोजकले अन्तिम चारमा स्थान सुरक्षित गरिसकेको छ ।
प्रतियोगिता अन्तर्गत मंगलबार अर्को विभागिय टिम त्रिभुवन आर्मी क्लब र झापा फूटबल क्लबबीच प्रतिस्पर्धा हुनेछ । कार्तिक २५ गतेसम्म संचालन हुने प्रतियोगिताको विजेताले ११ लाख ११ हजार एक सय ११ र उपविजेताले पाँच लाख ५५ हजार पाँच सय ५५ प्राप्त गर्नेछन् । यो राशी मधेस प्रदेशमा आयोजना हुने फूटबल प्रतियोगिता मध्येको उच्च हो ।
मधेस प्रदेशमा आयोजना हुने अन्य ठुला प्रतियोगितामध्ये १३औं संस्करण सम्पन्न भईसकेको जीतपुरसिमरा गोल्डकप र सातौं संस्करण सम्पन्न भएको राजर्षि जनक कपको पुरस्कार राशी समान छ । उक्त दुई प्रतियोगिताको पछिल्लो संस्करणको विजेताले १० लाख र उपविजेताले पाँच लाख प्राप्त गरेका थिए ।
