देउसीभैलोबाट संकलित रकमले वृद्धाश्रमका वृद्धवृद्धालाई न्यानो कपडा
सिमरा: सामाजिक कार्यका लागि स्थापित युवाहरुको संस्था युथ फर चेन्ज (परिवर्तनका लागि युवा) ले देउसीभैलोबाट संकलित रकमबाट वृद्धाश्रमका वृद्धवृद्धालाई न्यानो कपडा वितरण गरेको छ ।
संस्थाले जीतपुरसिमरा उपमहानगरपालिका १ पथलैयास्थित जेष्ठ नागरिक वृद्धाश्रमका वृद्धवृद्धालाई न्यानो कपडा वितरण गरेको हो । संस्थाका युवाले आश्रममै पुगेर ज्याकेट, स्विटर, टोपी, मोजा, ट्राउजरलगायतका न्यानो कपडा वितरण गरेका हुन् ।
गत महिनाको तिहारमा देउसीभैलोको आयोजना गर्दै दान संकलन गरेको संस्थाले सामाजिक गतिविधि गर्ने निर्णय गरेको थियो ।
विभिन्न रचनात्मक कार्यमा सक्रिय संस्थाले यसअघि नि:शुल्क आँखा शिविर, सरसफाइ, वृक्षरोपण, क्यान्सर पीडितलाई आर्थिक सहयोग, घाइते खेलाडीलाई उपचारार्थ आर्थिक सहयोग, सामाजिक सचेतनामूलक कार्यक्रमलगायतको काम गरिसकेको छ ।
