कलैयामा उपमहानगरपालिकाद्धारा स्वास्थ्य स्वयंसेविकालाई सम्मान
सिमराः कलैया उपमहानगरपालिकाले मंगलबार एक कार्यक्रमकाबीच नगर क्षेत्रभित्रका स्वास्थ्य स्वयंसेविकालाई सम्मान गरेको छ । २०औं सामुदाियक स्वास्थ्य स्वयंसेविका दिवसको अवसरमा उपमहानगरपालिकाले २७ जना स्वयंसेविकालाई सम्मान गरेको हो ।
उपमहानगरपालिकाका नगर प्रमुख विनोद साहले दोसल्ला ओढाउदै स्वयंसेविकालाई सम्मानपत्र प्रदान गरेका थिए । सम्मान कार्यक्रममा उपमहानगरपालिकाका उपसचिव प्रह्लाद वर्णवाल, स्वास्थ्य महाशाखा प्रमुख अजय जयसवाल, मनोज यादव, युएसएआईडीका तेजनारायण साह, आसमान नेपालका डा. वीरेन्द्र सिंहसहित कार्यालयका कर्मचारी, जनप्रतिनिधिको उपस्थिती रहेको थियो ।
यस वर्ष ‘स्वास्थ्य क्षेत्रमा दिगो विकास, महिला सामुदायिक स्वास्थ्य स्वयंसेविकाको संयुक्त प्रयास’ भन्ने नारासहित दिवस मनाइएको हो । स्वास्थ्य तथा जनसंख्या मन्त्रालयको अनुरोधपछि संघीय मामिला तथा सामान्य प्रशासन मन्त्रालयले समेत मंसिर १२ गते दिवस मनाउन स्थानीय तहलाई पत्राचार गरेको थियो ।
