अमेरिकाबाट पार्सल गरी पठाइएको लागूऔषध गाँजासहित तीन जना नियन्त्रणमा
सिमराः अमेरिकाबाट पार्सल गरी पठाइएको एक किलो गाँजासहित प्रहरीले तीन युवकलाई नियन्त्रणमा लिएको छ । लागूऔषध व्युरो वीरगन्ज र बारा प्रहरीको संयुक्त टोलीले कलैया उपमहानगरपालिका १ स्थित मोतिबागबाट तीन जनालाई नियन्त्रणमा लिएको हो ।
विदेशबाट लागूऔषध आएको सूचनाका आधारमा पुगेको टोलीले वीरगन्ज महानगरपालिका १ सिसवावारीका २२ वर्षीय नैमोदिन मियाँ, छपकैयाका २७ वर्षीय जीतेन्द्र साह सोनार र २२ वर्षीय कृष्णा सर्राफलाई नियन्त्रणमा लिएको बाराका प्रहरी प्रवक्ता दधिराम न्यौपानेले जानकारी दिएका छन् । उनिहरुबाट एक किलो एक सय ४६ ग्राम गाँजा बरामद गरिएको न्यौपानेको भनाई छ ।
अमेरिकाबाट पार्सल गरी पठाएको टिनको डिब्बाभित्रबाट गाँजा बरामद न्यौपानेले जानकारी दिए । अमेरिकाको कुन ठाँउबाट बारासम्म गाँजा आईपुग्यो भन्ने विवरण प्रहरीले खुलाएको छैन । बरामद भएको गाँजाको सम्बन्धमा अनुसन्धान भईरहेको प्रवक्ता न्यौपानेले जानकारी दिएका छन् ।
