‘सार्पसुटर’को मुद्धा मिलाईदिने भन्दै रकम ठगेको आरोपमा एक पक्राउ
सिमराः कलैयाका प्रिसिन्पल रुपेश स्वर्णकार हत्या प्रकरणमा प्रहरी नियन्त्रणमा रहेका भारतीय ‘सार्पसुटर’ सुजितकुमार सिंहको मुद्धा मिलाईदिने भन्दै परिवारसंग रकम ठगी गरेको आरोपमा एक जना पक्राउ परेका छन् । पक्राउ पर्नेमा महागढीमाई नगरपालिका १ का २३ वर्षीय श्यामबाबु साह रहेका छन् ।
जिल्ला प्रहरी कार्यालय बाराका अनुसार साहले प्रहरी नियन्त्रणमा रहेका सिंहको बुवासंग प्रहरी, वकिल र अदालतमा मुद्धा मिलाईने भन्दै १६ लाख रकम माग गरेका थिए । जसमध्ये एक लाख ९२ हजार रकम लिएको भन्दै सिंहका बुवा जयमंगलले दिएको उजुरीका आधारमा प्रहरीले साहलाई पक्राउ गरेको हो ।
साहलाई ठगी तथा अपराधिक विश्वासघात सम्बन्धी मुद्धामा अदालतबाट म्याद थप गरी अनुसन्धान भईरहेको बाराका प्रहरी प्रवक्ता दधिराम न्यौपानेले जानकारी दिएका छन् ।
कलैयास्थित बाल एकता बोर्डिङ स्कुलका प्रिन्सिपल स्वर्णकारको हत्याको मुख्य सुटर रहेको भन्दै प्रहरीले सिंहलाई पुस १० गते गोली हानेर पक्राउ गरेको थियो । बिश्रामपुरबाट पक्राउ परेका सिंहको अहिले कलैयास्थित प्रादेशिक अस्पतालमा उपचार भईरहेको छ ।
प्रिन्सिपल स्वर्णकारको कार्तिक १३ गते कलैयामा गोली प्रहार गरी हत्या गरिएको थियो । स्वर्णकार हत्या आरोपमा जिल्ला अदालत बाराले पुस २४ गते राधा गुप्ता, कौशल किशोर यादव, बिगु साह, अरुण यादव, प्रविण साह र सन्तोष प्रसादलाई पुर्पक्षका लागि थुनामा राख्न आदेश दिएको छ ।
घटनाको मुख्य सुटर रहेको बताउँदै आएको प्रहरीले गोली लागेर उपचार भईरहेका कारण सिंहलाई अदालतमा उपस्थित गराएको छैन ।
