विद्यार्थी मृत्यु प्रकरणः पीडित परिवारलाई १० लाख क्षतिपूर्तिसहित रोजगारी, निजी विद्यालयमा शोकविदा
सिमराः बाराको अमलेखगञ्जमा बुधबार बिहान रडले छेडेर मृत्यु भएका विद्यार्थी लक्की गोलेको परिवारले क्षतिपूर्तिवापत १० लाख रकम पाउने भएका छन् । नेपाल आयल निगमको अमलेखगञ्जस्थित प्रादेशिक कार्यालयमा भएको छलफलमा पीडित परिवारलाई क्षतिपूर्ति उपलब्ध गराउने सहमती भएको हो ।
क्षतिपूर्ति रकमसंगै लक्कीका अभिभावकमध्ये एक जनालाई आयल निगममा रोजगारी र काजक्रिया खर्चवापत २५ हजार रकम उपलब्ध गराउने सहमती भएको जीतपुरसिमरा उपमहानगरपालिका २१ का वडाध्यक्ष सुवास श्रेष्ठले जानकारी दिए । आयल निगमले काजक्रिया खर्चवापत २५ हजार रकम पीडित परिवारलाई हस्तान्तरण गरेको छ ।
अमलेखगञ्जस्थित नेपाल आयल निगमको प्रादेशिक कार्यालयले विद्युतिकरणका लागि भन्दै सडकको पेटीमा गाडेको पोलको रडमा छेडिएर स्थानीय ललित गोलेका ११ वर्षीय छोरा लक्कीको घटनास्थलमै ज्यान गएको थियो । घरबाट विद्यालयका लागि निस्किएका लक्कीको टाउको निगमको कार्यालय अगाडी पोलमा भर्याङ बनाउन राखिएको रडमा छेडिएको थियो ।
लक्की जीतपुरसिमरा १ पथलैयास्थित होली गार्डेन इङ्लिस स्कुलमा कक्षा ५ मा अध्ययनरत थिए । उनि विद्यालयको पोशाक लगाएर आयल निगम अगाडी रहेको पार्किङस्थलतर्फ जादै थिए । उक्त पार्किङ स्थलमा उनकी आमा बिमला गोलेले ठेला राखेर चिया र खाजाको पसल संचालन गर्दै आएकी थिईन् । लक्की पार्किङ स्थलबाट विद्यालयका लागि बस चढ्ने गरेका थिए ।
आयल निगमले कार्यालय (डिपो) बाट कर्मचारी निवासतर्फ विद्युतिकरणका लागि करिब तीन वर्ष अगाडी गाडिएको उक्त पोलमा चढ्नका लागि रड वेल्डिङ गरेर भर्याङ बनाइएको थियो । विद्युतिकरणको काम सम्पन्न भएपछि कार्यालयले उक्त रड निकाल्न वेवास्था गर्दा घटना हुन पुगेको हो ।
लक्कीको शव शल्यपरिक्षणपश्चात् परिवारले बुझेका छन् । उनको अन्तिम संस्कार विहीबार गरिने वडाध्यक्ष श्रेष्ठले जानकारी दिए ।
विद्यार्थी निधनको शोकमा जीतपुरसिमराका निजी विद्यालय विहीबार बन्द हुने
कक्षा ५ मा अध्यनरत लक्कीको निधनको शोकमा जीतपुरसिमराका निजी विद्यालय विहीबार बन्द हुने भएका छन् । उनि पथलैयास्थित होली गार्डेन इङ्लिस स्कुलमा अध्ययनरत थिए ।
लक्की निधनको शोकमा जीतपुरसिमराका निजी विद्यालयले शोकवक्तब्य जारी गर्दै एक दिनका लागि पठनपाठन बन्द हुने जनाएका छन् । एनप्याब्सन बाराका कोषाध्यक्ष एवम् न्यू एकता इङ्लिस बोर्डिङ स्कुलका प्रिन्सिपल मदन रिजालले जीतपुरसिमराका सबै निजी विद्यालयले शोकविदा दिएको जनाए ।
यो पढ्नुहोस्ः
