मुआब्जा रकम माग गर्दै तामागढीमा हुलाकी सडक प्रभावित स्थानीयको रिले अनशन जारी
सिमराः योजना सम्पन्न भएको चार वर्ष पुग्न लागिसक्दा पनि मुआब्जावापत्को रकम नपाएपछि तामागढी–सिम्रौनगढ हुलाकी सडक योजना प्रभावित स्थानीयको रिले अनशन शुक्रबार दोस्रो दिन पनि जारी छ । सरकारले निर्धारण गरेको मुआब्जावापतको रकम पटकपटक माग गर्दा समेत नपाएको भन्दै उनिहरुले बिहीबार रातीदेखि अनशन सुरु गरेका हुन् ।
चरणबद्ध आन्दोलनका कार्यक्रम गर्दै आएका स्थानीयले हुलाकी सडकको प्रस्थान विन्दु तामागढीमा प्रदर्शन गर्दै बिहीबार साँझदेखि अनशन सुरु गरेका थिए । स्थानीयको प्रदर्शनपछि पूर्वपश्चिम राजमार्गमा ठुलो संख्यामा प्रहरी परिचालन गरिएको छ ।
मुआब्जा रकम माग गर्दै स्थानीयले मुख्य राजमार्ग बन्द गर्न सक्ने भन्दै प्रहरी परिचालन गरिएको हो । प्रहरीले स्थानीयलाई राजमार्ग प्रवेश गर्न दिएको छैन् । राजमार्ग बन्द गर्न पुगेका उनिहरुलाई रोक लगाउन खोज्दा प्रहरीसंग घम्साघम्सी समेत भएको थियो ।
तमागढी–सिम्रौनगढ सडक निर्माण गर्ने क्रममा सरकारले कोल्हबी नगरपालिका, सिम्रौनगढ नगरपालिका, बारागढी गाउँपालिका र आदर्शकोतवाल गाउँपालिकाका स्थानीयको करिब ७० बिगाह जग्गा अधिग्रहण गरेको थियो । स्थानीयको जग्गा अधिग्रहण गरेर सडक निर्माण गरेवापत् सरकारले झण्डै तीन अर्ब मुआब्जा रकम दिनुपर्नेछ । तर योजना सम्पन्न भएको चार वर्ष पुग्न लागिसक्दा पनि सडकका लागि जग्गा छाडेका स्थानीयले मुआब्जावापतको रकम पाउन सकेका छैनन् ।
हुलाकी मार्ग आयोजना अन्तर्गत निर्माण भएको उक्त सडक करिब ४० किलोमिटर लम्बाई र सात मिटर चौडाईको छ । उक्त योजना निर्माण गर्न सडकको दायाँबायाँ दुबैतर्फबाट १५–१५ मिटर अधिग्रहण गरिएको थियो । अधिग्रहण गर्ने क्रममा नम्बरी जग्गामा बसोबास गर्दै आएका स्थानीयलाई प्रति कठ्ठा २० लाखका दरले मुआब्जा दिने निर्णय सरकारले गरेको थियो ।
तस्वीरः प्रलाद तिमिल्सिना
