समाज विकास युवा क्लब कलैया उपमहानगरपालिका फूटबल प्रतियोगिताको सेमिफाइनलमा प्रवेश
सिमराः समाज विकास युवा क्लब कलैया उपमहानगरपालिका फूटबल प्रतियोगिताको सेमिफाइनलमा प्रवेश गरेको छ । भोडाहा खेल मैदानमा शनिबार भएको तेस्रो क्वाटरफाइनल खेलमा सनराईजिङ क्लब उमजनलाई ४–१ ले पराजित गर्दै समाज विकास अन्तिम चारमा प्रवेश गरेको हो ।
समाज विकाको जितमा उदित नारायण चौधरी र अरविन्द चौधरीले समान २/२ गोल गरे । सनराईजिङका लागि देवमणी चौधरीले एक गोल फर्काए । समाजका विकासका उदित नारायण प्लेयर अफ दि म्याच घोषित भए ।
प्रतियोगिता अन्तर्गत आइतबार नव जनप्रगती युवा क्लब करैयामाई र उजाला युथ क्लब बरेवा बैरियाबीच अन्तिम क्वाटरफाइनल खेल हुनेछ ।
कलैया उपमहानगरपालिकाको सहयोगमा नगर खेलकुद विकास समितिले आयोजना गरेको प्रतियोगिता जेठ ३ गते सुरु भएको हो । जेठ १० गतेसम्म आयोजना हुने प्रतियोगिताको विजेताले ३० हजार र उपविजेताले २० हजार नगद प्राप्त गर्नेछन् ।
