वीरगन्जको आदर्शनगरस्थित सडकमा रोकिराखेका दुई मोटरसाइकलसहित विद्युतिय पोलमा आगलागी
सिमराः वीरगन्जको आदर्शनगरस्थित नेपाल ईन्भेष्टमेन्ट मेघा बैंक अगाडी पार्किङ गरेर राखिएका दुई वटा मोटरसाइकलमा मंगलबार आगलागी भएको छ । आगलागीबाट दुई वटै मोटरसाइकल पूर्णरुपमा जलेर नष्ट भएको छ ।
सडकमा रोकिराखेको वीरगन्ज महानगरपालिका ३ का सञ्जयप्रसाद यादवको प्र.२–०३–०१८प ८२१९ र वडा नम्बर २० हरपतगंजका मिथिलेशप्रसाद यादवको प्र.२–०३–००१ प ७९०४ नम्बरको पल्सर मोटरसाइकलमा आगो लागेको हो । दुवै जनाको मोटरसाइकल बैंक अगाडीको विद्युतिय पोल नजिक पार्किङ गरेर राखिएको थियो ।
मोटरसाइकलसंगै छेउमै रहेको विद्युतिय पोलमा समेत आगो लागेको थियो । पोलमा आगो लाग्दा तारहरु जलेर नष्ट भएका छन् । पोल र मोटरसाइकलमा लागेको आगो वीरगन्ज महानगरपालिकाको दमकलको सहायतामा नियन्त्रणमा लिइएको थियो ।
आगो कसरी लाग्यो भन्ने कारण खुल्न सकेको छैन । पोलमा समेत आगो लागेकाले विद्युत सर्ट भएर आगलागी भएको आशंका गरिएको छ । तर आगलागीको कारण प्रहरीले खुलाएको छैन ।
वडा कार्यालय विर्ताका प्रहरी निरीक्षक पुष्कर बोगटीले आगलागीको कारण अहिले खुल्न नसकेको र अनुसन्धान भईरहेको जानकारी दिएका छन् ।
