बारामा अज्ञात समूहको खुकुरी प्रहारबाट एक घाइते
सिमराः बाराको निजगढ नगरपालिका १२ रामथली मा गएराति अज्ञात समूहको खुकुरी प्रहारबाट एकजना घाइते भएका छन् ।रामथलीका अन्दाजी ४० वर्षीय भीमबहादुर गोले अज्ञात समूहको खुकुरी प्रहारबाट घाइते भएका हुन् ।
प्रहरीका अनुसार घरको झ्याल खुला राखेर सुतिरहेको अवस्थामा गएराति १ः३० बजे मोटरसाइकलमा आएका व्यक्तिले गोलेमाथि खुकुरी प्रहार गरी फरार भएका थिए । घटनाको खबर पाएलगत्तै अस्थायी प्रहरी पोस्ट रतनपुरबाट पुगेको प्रहरी टोलीले घटनास्थलबाट करिब सय मिटर पर सडकमा ग.२४प ७०४६ नम्बरको मोटरसाइकल र तीन थान मोबाइल बरामद गरेको इलाका प्रहरी कार्यालय निजगढका प्रहरी निरीक्षक सुमित कुशवाहले बताए ।
घटनापछि आफन्त र स्थानीयले होहल्ला गरेपछि उनीहरू मोटरसाइकल र मोबाइल छोडेर खेतको बाटो हुँदै फरार भएका थिए । घटनास्थलबाट बरामद मोटरसाइकल र मोबाइल सिमको आधारमा घटनाको अनुसन्धान अघि बढाइएको निरीक्षक कुशवाहले बताए ।
घाइते गोलेको टाउको, निधार, च्यापु, घाँटी र दायाँ हातमा चोट लागेको छ । उनको हेटौँडास्थित चुरे हिल अस्पतालमा उपचार भइरहेको छ । गोलेको स्वास्थ्य अवस्थामा सुधार हुँदै आएको प्रहरीको भनाइ छ ।
