ठोरीबाट हात्तीको दारासहित तीन जना पक्राउ
वीरगन्जः पर्सा प्रहरीले हात्तीको दारासहित तीन जनालाई पक्राउ गरेको छ । हात्तीको दारा किनबेच भईरहेको भन्ने सूचनाका आधारमा परिचालन भएको प्रहरी टोलीले ठोरीबाट दुई थान दारासहित तीन जनालाई पक्राउ गरेको हो ।
पक्राउ पर्नेमा ठोरी गाँउपालिका ४ का कुइसङ लामा, वीरगन्ज महानगरपालिका १४ पिप्राका प्रेम शर्मा र वीरगन्ज ३१ का अमिरीलाल महतो रहेका छन् । उनिहरुकै बयानका आधारमा प्रहरीले ठोरी गाउँपालिका ४ स्थित चन्द्र परियारको खेतमा खाल्डो खनेर राखेको अवस्थामा दारा बरामद गरेको हो ।
जिल्ला प्रहरी कार्यालय पर्साका प्रवक्ता दीपक भारतीका अनुसार बरामद भएको एउटा दाराको तौल झण्डै २१ किलो बराबर छ । साथै पक्राउ परेका व्यक्तिबाट प्राप्त नोटमा सूचनास्वरुप मिति समेत उल्लेख भएको पाइएकाले थप अनुसन्धान भईरहेको भारतीले बताए ।
भारतीका अनुसार दारा किनबेच भईरहेको सूचना पाएपछि प्रहरी टोली खोजीका लागि पुगेको थियो । उनिहरुमाथि डिभिजन वन कार्यालयसंग समन्वय गरेर कारवाही प्रक्रिया थालिएको भारतीले जानकारी दिए ।
