वीरगन्जबाट छुटेको एन्जल बसमा थिए सात भारतीयसहित २४ यात्रु
सिमरा: नारायणगढ-मुग्लिन सडकखण्डको सिमलतालमा शुक्रबार बिहान पहिरोले बगाएर त्रिशुली नदीमा बेपत्ता भएको एन्जल बसमा २४ जना सवार थिए । जसमध्ये सात भारतीयसहित २१ यात्रु, तीन जना चालक, सहचालक र सवारीधनी रहेका छन् ।
वीरगन्जको प्रतिमाचोकबाट बिहीबार राति ८ बजे छुटेको बागमती प्र.०३००६ ख १५१६ नम्बरको उक्त बस र काठमाडौंबाट गौरका लागि हिँडेको गणपती डिलक्स बस सिमलतालमा बिहान करिब ३.३० बजे आएको पहिरोले बगाउँदा त्रिशुली नदीमा खसेको थियो । गणपती डिलक्समा ४३ यात्रु सवार थिए ।
त्रिशुलीमा बेपत्ता दुवै बस र यात्रुको खोजी भईरहेको छ । पहिरोले बस बगाउँने क्रममा तीन जना यात्रुले भने झ्यालबाट निस्किएर ज्यान जोगाउन सफल भएका छन् ।
बस बेपत्ता भएसंगै यात्रुको परिचय र ठेगाना खोज्न थालिएको छ । घटनापछी वीरगन्जस्थित एन्जल्स बसको काउन्टरले सात भारतीयसहित २१ यात्रु र तीन जना चालक दलको सदस्य बसमा सवार रहेको जनाएको छ ।
बसका चालक वीरगन्जका जवाहिर महतो र सहचालक चौधरी थरका ठेगाना नखुलेका पुरुष छन् । यसैगरी सवारीधनी राजेन्द्र केसी समेत बसमा थिए । उनको पनि ठेगाना खुल्न बाँकी छ ।
बसमा बारा मुसहर्वाका प्रमानन्द नाम गरेका एक यात्रु रहेको खुलेको छ । उनको थप विवरण खुल्न बाँकी छ । पर्सा जिल्लाका १२ यात्रु बसमा सवार थिए ।
उता सखुवा प्रसौनी गाउँपालिकाका अध्यक्ष यशवन्त यादवले सामाजिक संजालमार्फत एन्जल्स बसमा दुई स्वास्थ्य कर्मचारीसहित पाँच जना आफ्नो पालिका भित्रका नागरिक रहेको जनाएका छन् ।
