गायक अमात्यको बारामा रहेको १२ बिगाह जग्गा किर्ते गरी १९ करोड ऋण लिनेलाई कैद सजाय
सिमराः विशेष अदालतले गायक योगेश्वर अमात्यको बारा बिश्रामपुरस्थित १२ बिगाह जग्गा किर्ते गरी नक्कली ऋण लिने आठ जनालाई कैद सजाय सुनाएको छ ।
जग्गा किर्ते गरी १९ करोड ऋण लिएको अभियोगमा अदालतले दुई जनालाई चार वर्ष, दुई जनालाई दुई वर्ष र चार जनालाई एक वर्षको कैद सजाय सुनाएको हो । विशेष अदालतका सदस्य डा. खुशीप्रसाद थारु, तेजनारायण सिंह राई र रितेन्द्र थापाको इजलासले पाँच जनालाई सात करोड ६० लाख र चार जनालाई ३ करोड ८० लाख जरिवाना समेत तोकेको छ ।
अदालतले रेशमबहादुर सिलवाल र उविन्दराज शाक्यलाई चार वर्ष तथा सात करोड ६० लाख जरिवाना तोकेको हो । यसैगरी मुक्तिनाथ गौतम र एसकुमार महर्जनलाई दुई वर्ष कैद र सात करोड ६० लाख जरिवाना तोकिएको छ ।
यसैगरी रामप्रसाद अधिकारी, ईश्वर पोखरेल, शोभा शाक्य र कुशन प्रधानलाई एक–एक वर्षका दरले कैद र जनही तीन करोड ८० लाख जरिवाना निर्धारण गरिएको छ । मालपोत कार्यालय बाराको छाप र कागज नक्कली बनाएर सोही कागजातका आधारणमा ऋण लिएको आरोपमा उनिहरुविरुद्ध मुद्धा दायर भएको थियो ।
गायक अमात्यले आफू संचालक रहेको बिल्वा भूमि वन प्रा.लिका नाममा रहेको उक्त १२ विगाह जग्गाबाट ऋण प्रवाह भएको जानकारी पाएपछि नेपाल प्रहरीको केन्द्रीय अनुसन्धान व्यूरोमा जाहेरी दिएका थिए । उक्त जग्गाको किर्ते कागजातका आधारमा काठमाडौं न्यूरोडस्थित कुमारी बैंकबाट १९ करोड ऋण प्रवाह भएको थियो ।
