यस वर्षको सुबोध स्मृति पत्रकारिता पुरस्कार गुप्तालाई प्रदान गरिने
सिमरा: प्रतीक दैनिकले यस वर्षको सुबोध स्मृति पत्रकारिता पुरस्कार वीरगन्जकी महिला पत्रकार बिमला गुप्तालाई प्रदान गर्ने भएको छ ।
प्रतीक दैनिकका प्रधान सम्पादक जगदीशप्रसाद शर्माको अध्यक्षतामा बसेको बैठकले स्व. फोटोपत्रकार सुबोध सिंहको स्मृतिमा स्थापित उक्त पुरस्कार गुप्तालाई प्रदान गर्ने निर्णय गरेको हो ।
५१ हजार राशीको उक्त पुरस्कार प्रतीक दैनिकको भदौ १ गते हुने वार्षिकोत्सब कार्यक्रममा प्रदान गरिनेछ । पत्रकार गुप्ता नागरिक दैनिक र पर्सा अनलाइनमा आवद्ध छिन् ।
यसैगरी प्रतीक दैनिकले यस वर्षको उत्कृष्ट संवाददातामा धर्मेन्द्र चौरसिया, स्तम्भकारमा कुमार रूपाखेती र कर्मचारीमा महमद तबरेज हवारीलाई पुरस्कृत गर्ने निर्णय गरेको छ ।
प्रतीक दैनिकले सुबोध स्मृति पत्रकारिता पुरस्कारबाट प्रत्येक वर्ष एक जना पत्रकारलाई पुरस्कृत गर्दै आएको छ ।
