स्कुल बसले ठक्कर दिँदा धनुषामा एक बालिकाको मृत्यु
सिमराः धनुषामा स्कुल बसको ठक्करबाट एक बालिकाको मृत्यु भएको छ । मृत्यु हुनेमा धनुषाधाम नगरपालिका ३ का सरोज शर्माका तीन वर्षीया छोरी मान्सी रहेकी छिन् ।
धनुषाधामको सर्साबाट विद्यार्थी लिन धनुषाधाम आउँदै गरेको ना१ख ९६९६ नम्बरको बसले बाटोमा खेलिरहेकी मान्सीलाई ठक्कर दिएको हो । ठक्करबाट गम्भीर घाईते बालिकाको उपचारका क्रममा प्रादेशिक अस्पताल जनकपुरमा मृत्यु भएको धनुषाका प्रहरी प्रवक्ता बरुणबहादुर सिंहले जानकारी दिए ।
सिंहका अनुसार उक्त बस धनुषाधाम नगरपालिका ३ स्थित बाल आवासीय माध्यमिक विद्यालयको हो । बस चालकलाई नियन्त्रणमा लिएको र शव शल्यपरिक्षणका लागि जनकपुर अस्पतालमा राखिएको प्रवक्ता सिंहले जानकारी दिए ।
