क्रियटिभ जीतपुरसिमरा भेट्रान कपः पथलैया र झापा बिजयी
सिमराः क्रियटिभ प्रथम जीतपुरसिमरा भेट्रान फूटबल प्रतियोगिता अन्तर्गत बुधबार बिहान भएको दुई खेलमा पथलैया र झापा बिजयी भएको छ । पथलैयाले न्यु युनिक भेट्रान खैर्वा र प्ले टुगेदर झापाले वीरगन्ज सिटी भेट्रानलाई पराजित गरेको हो ।
सिमरा रंगशालामा भएको पहिलो खेलमा पथलैयाले खैर्वामाथि टाईब्रेकरबाट २–१ को जीत निकालेको थियो । निर्धारित समयमा दुबै टिमले १–१ को बराबरी खेलेपछि नतिजा टाईब्रेकरबाट निकालिएको हो ।
टाईब्रेकरमा पथलैयाका लागि बसन्त लामा र सत्यलाल चौधरीले गोल गरे । खैर्वाका लागि भने अरुण चौधरी मात्रै गोल गर्न सफल भए । खैर्वाका रामा बछारको प्रहार पथलैयाका गोलरक्षक पूर्ण लामाले बचाउ गर्दा दिपलाल रामको प्रहार पोष्ट नजिकबाट बाहिरिएको थियो ।
यसैगरी दोस्रो खेलमा झापाले वीरगन्जलाई ३–० ले पराजित गरेको हो । झापाको जीतमा अंगुरकुमार खड्गीले दुई र नविनकुमार चौधरीले एक गोल गरे । दुई गोल गरेका खड्गी प्लेयर अफ दि म्याच घोषित भए ।
प्रतियोगिता अन्तर्गत तेस्रो खेलमा अहिले (यो समाचार तयार गर्दा) आयोजक नव जनजागृति भेट्रान क्लब र वीरगन्ज युनिटि भेट्रान क्लबबीच खेल भईरहेको छ । यसैगरी चौथो खेलमा सरस्वती नगर भेट्रान क्लब काठमाडौं र वीरगन्ज युथ भेट्रान क्लबबीच खेल हुनेछ ।
