क्रियटिभ जीतपुरसिमरा भेट्रान फूटबलः उपाधिका लागि झापा र वीरगन्ज भिड्ने
सिमराः बाराको सिमरामा जारी क्रियटिभ प्रथम जीतपुरसिमरा भेट्रान फूटबल प्रतियोगिताको उपाधिका लागि झापा र वीरगन्ज भिड्ने भएका छन् । सिमरा रंगशालामा भएको अन्तिम सेमिफाइनल खेलमा निजगढ भेट्रानमाथि ६–० को फरालिको जित निकाल्दै युनिटी युथ वीरगन्जले प्ले टुगेदर भेट्रान झापासंगको भेट पक्का गरेको हो ।
पहिलो सेमिफाइनल खेलमा डुमरवाना भेट्रानमाथि १–० को जित निकाल्दै झापा फाइनलमा प्रवेश गरिसकेको छ । झापासंग उपाधि भिडन्त पक्का गर्ने स्टार भेट्रान खेलाडी सम्मिलित वीरगन्जले निजगढमाथि सहज जित निकालेको हो ।
वीरगन्जका लागि निलेन्द्र देवानले तीन गोल गर्दै ह्याट्रिक पूरा गरे । यसैगरी बिकर्ण श्रेष्ठ, कृष्ण शाक्य र हेमन्त चौरसियाले एक–एक गोल गर्दै टिमलाई ६–० को जित दिलाए । ह्याट्रिक गरेका निलेन्द्र प्लेयर अफ दि म्याच घोषित भए । उनलाई नेकपा एमालेका युवा नेता त्रिलोक बिक्रम शाहले पुरस्कृत गरेका थिए ।
प्रतियोगिता अन्तर्गत शनिबार दिउँसो १ बजे झापा र वीरगन्जबीच फाइनल खेल हुनेछ । उपाधि विजेताले एक लाख र उपविजेताले ५० हजार नगद प्राप्त गर्नेछ ।
फाइनल खेल अघि वीरगन्ज युथ र आयोजक नव जनजागृति भेट्रान क्लबीच मैत्रीपुर्ण महिला फूटबल खेल हुनेछ ।
