महेन्द्रनगर नकआउट फूटबलको उपाधिका लागि डुमरवाना र पिलुवा भिड्ने
सिमराः डुमरवाना भेट्रान क्लब महेन्द्रनगर नकआउट फूटबल प्रतियोगिताको फाइनलमा प्रवेश गरेको छ । जीतपुरसिमरा १६ महेन्द्रनगर खेल मैदानमा भएको दोस्रो सेमिफाइनल खेलमा जेवाईसिसि डुमरवानालाई टाईब्रेकमा ३–२ ले पराजित गर्दै डुमरवाना भेट्रान फाइनलमा प्रवेश गरेको हो ।
निर्धारित समयमा दुबै टिमले १–१ को बराबरी खेलेपछि खेल टाईब्रेकरमा धकेलिएको थियो । टाईब्रेकरमा सिसस थापा, बिक्रम लामा र कृपा चौधरीले गोल गर्दै टिमलाई उपाधि होडमा उभ्याए । यता जेवाईसिसिका पिके चौधरी र सन्देश चौधरीले गोल गर्दा अभिशेक चौधरीको प्रहार विपक्षी गोलरक्षक युनेश चौधरीले बचाउ गरे ।
युनेश प्लेयर अफ दि म्याच घोषित भए । उनलाई जीतपुरसिमरा उपमहानगरपालिका वडा नं. १ का वडाध्यक्ष हिराबहादुर गुरुङले पुरस्कृत गरेका थिए ।
डुमरवाना भेट्रानले अब उपाधिका लागि पिलुवा फूटबल क्लबसंग खेल्नेछ । पहिलो सेमिफाइनलमा सिंगोल फूटबल क्लबलाई ९–२ ले पराजित गर्दै पिलुवा फाइनलमा प्रवेश गसिकेको छ । प्रतियोगिताको फाइनल खेलमा मंसिर १८ गते हुनेछ ।
महेन्द्रनगर युथ क्लबको आयोजनामा जारी प्रतियोगिताको विजेताले ५० हजार र उपविजेताले २५ हजार नगद प्राप्त गर्नेछ ।
