पथलैयामा नकआउट फूटबल सुरु, थानिमाईको बिजयी सुरुवात
सिमराः जीतपुरसिमरा उपमहानगरपालिका १ पथलैयामा शनिबारदेखि नकआउट फूटबल प्रतियोगिता सुरु भएको छ । पथलैयास्थित गैरी खेल मैदानमा सुरु भएको प्रतियोगिताको उद्घाटन खेलमा थानिमाई फुटबल क्लबले बिजयी सुरुवात गरेको छ ।
थानिमाईले सगरमाथा फूटबल क्लबलाई १–० ले पराजित गरेको हो । प्रतियोगिता अन्तर्गत आइतबार एभरग्रीन र अल्लारे फूटबल क्लबबीच खेल हुनेछ ।
यसअघि प्रतियोगिताको उद्घाटन जीतपुरसिमरा उपमहानगरपालिका वडा नं. १ का वडाध्यक्ष हिराबहादुर गुरुङले गरेका थिए । उद्घाटन कार्यक्रममा वडासदस्य राकेश सुब्बा, फुसमदेवी श्रेष्ठ, चित्रमाया बिक, बरिष्ठ प्रहरी नायब निरीक्षक रोशन अधिकारीसहित पथलैयाका रहेका विभिन्न संघसंस्थाका प्रतिनिधिको उपस्थिती रहेको थियो । दिव्य ज्योती क्लबका अध्यक्ष नवराज अधिकारीको अध्यक्षतामा सम्पन्न कार्यक्रमको सहजीकरण भूवन थापाले गरेका थिए ।
उद्घाटन कार्यक्रममा वडा कार्यालयको तर्फबाट वडाध्यक्ष गुरुङसहितका जनप्रतिनिधिले पथलैयामा रहेका तीन वटा क्लबलाई जर्सी हस्तान्तरण गरेका थिए ।
पुस ६ गतेसम्म संचालन हुने प्रतियोगिताको विजेताले २५ हजार र उपविजेताले १५ हजार नगद प्राप्त गर्नेछ । जीतपुरसिमरा उपमहानगरपालिका वडा नं. १ को कार्यालयको मुख्य सहयोगमा दिब्य ज्योती युवा क्लबले आयोजना गरेको प्रतियोगितामा १६ टिमको सहभागिता रहनेछ । प्रतियोगितामा थानीमाई, सगरमाथा, एभरग्रिन, अल्लारे, चकरी, बिबिवाईसी, एसकेवाईसी, सिमरा युनाईटेड, सिमरा ब्वाईज, लामिडाँडा, हुलास, रामवन, औराह, सुन्दरबस्ती, शुभारम्भ र आयोजकको सहभागिता रहेको छ ।
प्रतियोगितालाई नयाँ गोरेटो पुर्नस्थापना केन्द्र, शिवम ढुवानी सेवाले सहप्रायोजकको रुपमा सहयोग गर्ने भएका छन् । यसैगरी लायन्स क्लब अफ सिमरा युथ, इयाङ् छ्रयुब छोईलिङ गुम्बा सहयोगी संस्थाको रुपमा रहनेछन् भने आईटी पार्टनरमा मुनसाईन टेक्नोलोजी र मिडिया पार्टनरमा इशिलालेख डट कम रहेको छ ।
