पर्सा प्रहरीद्वारा ठूलो परिमाणमा लागुऔषध गाँजा सहित चार जना पक्राउ
सिमराः पर्सा प्रहरीले ठूलो परिमाणमा लागुऔषध गाँजासहित मंगलबार राति चार जनालाई पक्राउ गरेको छ । जिल्ला प्रहरी कार्यालय पर्साबाट खटेको विशेष टोलीले ५० किलो लागु औषध गाँजासहित चार जनालाई पक्राउ गरेको हो ।
पक्राउ पर्नेमा बहुदरमाई नगरपालिका १ विश्रामपुरका ४० वर्षिय पारस यादव, सोहि स्थानका ५२ वर्षिय मैनादिन मियाँ, बहुदरमाई नगरपालिका ७ तिनटोलियाका ३६ वर्षिय अकबर मियाँ र छपकैयाका ४५ वर्षिय शिव महतो रहेका छन् ।
विशेष सूचनाको आधारमा प्रहरीले वीरगन्ज महानगरपालिका वडा नं. २० हरपतगञ्ज स्थित चोकमा कुलोको बाटो भएर जाँदै गरेको अवस्थामा चारजना अपरिचित व्यक्तिहरुलाई रोकेर तलासी लिदाँ चार पोकामा ५० किलो लागुऔषध गाँजा बरामद भएको जिल्ला प्रहरी कार्यालयका प्रवक्ता किशोर लम्सालले जानकारी दिए ।
प्रहरीका अनुसार उनिहरुले प्लाष्टिकको बोराभित्र रातो प्लाष्टिकले बेरि राखिएको अवस्थामा उक्त गाँजा फेला परेको हो । पक्राउ परेका उनिहरुलाई नियन्त्रणमा लिई लागूऔषध सम्बन्धि कसुरमा अनुसन्धान कार्य भईरहेको पर्सा प्रहरीले जनाएको छ ।
