वीरगन्जमा तेजस एकेडेमीको बसको ठक्करबाट साइकल यात्रुको मृत्यु
सिमराः वीरगन्ज महानगरपालिका १६ स्थित सडकमा मंगलबार बिहान दुर्घटना हुँदा एक साइकल यात्रुको मृत्यु भएको छ । मृत्यु हुनेमा बाराको फेटा गाउँपालिका ५ का ४५ वर्षीय चोकट भन्ने तैमुदिन मियाँ रहेका छन् ।
तेजस एकेडेमीको ना५ख १५०४ नम्बरको बसले ठक्कर दिँदा मियाँको मृत्यु भएको हो । प्रहरीका अनुसार तीव्र गतिमा गुडिरहेको बसले साइकललाई ठक्कर दिएको हो ।
घाइते भएका मियाँलाई नारायणी अस्पतालमा पुर्याएलगत्तै चिकित्सकले मृत घोषित गरेको वडा प्रहरी कार्यालय विर्ताका प्रहरी निरीक्षक निरोज चौलागाईले जानकारीले दिए ।
ठक्कर दिने बस र त्यसका चालक देवा पासवानलाई नियन्त्रणमा लिएर अनुसन्धान भइरहेको उनले बताए ।
