जीतपुरसिमरा वडा नम्बर ६ को वडा कार्यालय भवन शिलान्यास
सिमराः जीतपुरसिमरा उपमहानगरपालिका वडा नम्बर ६ को वडा कार्यालय भवनको आइतबार शिलान्यास गरिएको छ । भवनको एक कार्यक्रमकाबीच मधेस प्रदेशसभा सदस्य देवनारायण चौधरीले शिलान्यास गरेका हुन् ।
२०७४ सालदेखि भाडाको घरबाट सेवा प्रदान गर्दै आईरहेको वडा कार्यालयले करिब ५३ लाखको लागतमा ६ कोठे भवन निर्माण गर्न लागेको हो । भवन निर्माणपछि सेवा प्रवाहमा सहज हुने वडाध्यक्ष कैमुदिन अंसारीले बताएका छन् ।
स्थानीय समाजसेवी बदरुल होदा अंसारीले भवन निर्माणका लागि एक कट्ठा पाँच धुर जमिन उपलब्ध गराएका हुन् । अंसारीले भवन शिलान्यास कार्यक्रममा जग्गाको लालपूर्जा समेत वडाध्यक्ष अंसारीलाई हस्तान्तरण गरेका छन् ।
भवन शिलान्यास कार्यक्रममा जीतपुरसिमरा उपमहानगरपालिकाका नगर उपप्रमुख भोलाप्रसाद अधिकारी, वडा नम्बर ७ का वडाध्यक्ष सुनिल गुप्ता, कार्यपालिका सदस्य बुद्धकुमारी अधिकारी, वडा नम्बर ३ की कार्यबाहक वडाध्यक्ष माया विक, एमाले जिल्ला कमिटी सदस्य अनिल गुप्ता, नेकपा एमाले वडा नं. २ का वडाध्यक्ष रवीन्द्र खकुरेल, एमाले वडा नं. ३ का वडाध्यक्ष शुक्र श्रेष्ठ, स्थानीय युवा कमरुल अंसारीलगायतको उपस्थिती रहेको थियो ।
