मुलुकका लागि केपी ओलीको विकल्प छैनः पूर्वमन्त्री पौडेल
सिमराः नेकपा एमाले बारा क्षेत्र नम्बर ४ को समन्वय कमिटीको बैठक सम्पन्न भएको छ । एमालेले घोषणा गरेको वडा केन्द्रीत तीन महिने अभियान संचालनका लागि समन्वय कमिटीको बैठक बसेको हो ।
बैठकलाई सम्बोधन गर्दै एमाले पोलिटव्यूरो सदस्य एवम् पूर्वमन्त्री पुरुषोत्तम पौडेलले राष्ट्रियताको पक्षमा उभिन सक्ने पार्टी नेकपा एमाले मात्रै भएको दाबी गरे । उनले एमालेका अध्यक्ष केपी शर्मा ओली राष्ट्रवादी नेता भएको उल्लेख गर्दै एमाले र मुलुकका लागि ओलीको विकल्प नभएको समेत बताए । भारतले नाकाबन्दी गर्दा डटेर सामना गरेको समय स्मरण गर्दै नेता पौडेलले देशको हितका निम्ति प्रधानमन्त्री ओलीले गरेका कामलाई बिर्सन नहुने बताए ।
बैठकमा केन्द्रीय सदस्य एकबाल मियाँ, मधेस प्रदेश कमिटी सचिव मनोज पौडेल, बाराका अध्यक्ष अध्यानन्द पाण्डे, प्रदेश कमिटी सदस्य अमर यादव, सुन्दर विक, उमेश गुप्ता, जिल्ला कमिटीका उपाध्यक्ष भुलन चौधरी, उपसचिव जवाहिर अन्सारीलगायतले अभियानका विषयमा सुझाव दिएका थिए ।
क्षेत्रीय समन्वय कमिटीका संयोजक ध्रुव यादवको अध्यक्षतामा सम्पन्न बैठकको सहजीकरण गजेन्द्र पटेलले गरेका थिए भने अशेश्वर गुप्ताले स्वागत मन्तव्य राखेका थिए ।
