स्वास्थ्य सेवामा सबैको पहुँच सुनिश्चित गर्नुपर्छः उपराष्ट्रपति यादव
परवानीपुरः उपराष्ट्रपति रामसहाय प्रसाद यादवले नेपालको संविधानले स्वास्थ्य सेवालाई नागरिकको मौलिक हकका रूपमा स्थापित गरेको कुरा उल्लेख गर्दै यसका लागि सबैको पहुँच सुनिश्चित गर्नुपर्ने आवश्यकता रहेको बताएका छन् । उपराष्ट्रपति यादवले नागरिकको पहुँच सुनिश्चित गर्न सरकारी र निजी स्वास्थ्य क्षेत्रको सक्रिय भूमिका महत्वपूर्ण रहेको बताए ।
बाराको परवानीपुरस्थित रामकुमार महावीरप्रसाद केडिया आँखा अस्पतालको स्वर्ण महोत्सव कार्यक्रमलाई सम्बोधन गर्दै उपराष्ट्रपति यादवले भने ‘नेपालको संविधानले स्वास्थ्य सेवालाई मौलिक हकका रूपमा मान्यता दिएको छ र यसलाई सुनिश्चित गर्न सरकारले आफ्ना नीति, योजना र कार्यक्रमहरूलाई प्राथमिकतामा पनि राखेको छ । ’
उपराष्ट्रपति यादवले ऐतिहासिक, सांस्कृतिक र औद्योगिक नगरीमा केडिया आँखा अस्पतालले उच्चस्तरीय उपचार सेवा उपलब्ध गराउँदै आएकोमा खुशी व्यक्त गरे । उपराष्ट्रपति यादव कार्यक्रम सकेर गृह जिल्ला हुँदै साँझ काठमाडौं फर्किएका छन् ।
