तास खेल्दा खेल्दै विवाद, सापटी फिर्ता मागेपछि हत्या (हेर्नुस् भिडियो)
सिमराः आफ्नै साथीको हत्या गरेको अभियोगमा पर्सा प्रहरीले तीन युवकलाई पक्राउ गरि बिहीवार सार्वजनिक गरेको छ । वीरगन्ज महानगरपालिका वडा नम्बर २७ उदयपुर घुर्मी घर भएका १९ वर्षीय इशालप्रसाद कुर्मीको हत्या गरेको अभियोगमा प्रहरीले सोही ठाउँका तीन युवकलाई पक्राउ गरि सार्वजनिक गरेको हो ।
पक्राउ पर्नेमा १९ वर्षीय मुकेशप्रसाद यादव, १९ वर्षीय अरुणकुमार यादव र १९ वर्षीय मुना तिवारी रहेका छन् । प्रहरीका अनुसार पक्राउ परेका युवकहरु र मृतक साथी थिए । उनिहरुबीच तास खेल्दाखेल्दै विवाद भएको र सोही क्रममा तीन जना मिलेर इशालको हत्या गरेको पर्साका प्रहरी उपरीक्षक गौतम मिश्रले जानकारी दिएका छन् ।
मिश्रका अनुसार पक्राउ परेकामध्ये मुकेशप्रसाद यादव र इशालबीच विवाद भएको थियो । विवाद बढ्दै गएपछि मुकेशले अन्य साथीसंग मिलेर इशालको हत्या गरेको देखिन आएको प्रहरी उपरीक्षक मिश्रको भनाई छ ।
इशाल फागुन ७ गते काम गर्न जान्छु भन्दै घरबाट निस्किएका थिए । तर उनि त्यो दिन घर फर्किएनन् । छोरा घर नफर्किएपछि बुवा जोगिन्द्रप्रसाद कुर्मीले फागुन ८ गते जिल्ला प्रहरी कार्यालय पर्सामा इशालको हुलियासहित खोजतलाशका लागि निवेदन दिएका थिए ।
फागुन ११ गते वीरगन्ज महानगरपालिका २८ स्थित भेडैया खोलामा तैरिरहेको अवस्थामा एउटा शव फेला पर्यो । उक्त शव फागुन ७ गते घरबाट निस्किएका इशालकै रहेको पुष्टि भयो ।
घटनाको अनुसन्धान गर्दै जाने क्रममा इशाल फागुन ७ गते घरबाट निस्किएर साथीहरुसंग तास खेल्न गएका थिए । तास खेल्दै जाने क्रममा उनिहरुबीच विवाद सुरु भयो । मुकेशले इशालसंग ३५ सय रुपैया सापटी लिएका थिए । इशालले सापटी फिर्ता माग्न थालेपछि विवाद बढेको हो । विवाद बढेपछि सापटी फिर्ता नगर्ने मनसायले साथीहरुसंग मिलेर इशाललाई नजिकैको रुखमा टाउको ठोक्काएर अचेत बनाएको र हात बाधेर खोलामा फालिदिएको बयान मुकेशले प्रहरीलाई दिएको प्रहरी उपरीक्षक मिश्रको भनाई छ ।
प्रहरीले शव फेला परेकै दिन तीनै जना युवकलाई पक्राउ गरेको हो । मुकेशले इशालको हत्या आफूले गरेको स्विकारेका छन् । प्रहरीले घटनास्थलबाट मृतक युवकको पर्स, साइकल, चप्पल बरामद गरेको छ । यसैगरी मृतकले प्रयोग गर्ने मोबाइल अभियुक्त मुकेशसंग बरामद भएको प्रहरी नायब उपरीक्षक एवम् प्रवक्ता सुवास भट्टले जानकारी दिएका छन् ।
पक्राउ परेका तीनै जना युवकलाई पर्सा जिल्ला अदालतबाट ६ दिनको म्याद लिएर अनुसन्धान गरिरहेको प्रवक्ता भट्टले बताए ।
