सिमरामा स्तन तथा पाठेघर जाँच शिविर सुरु, पहिलो दिन २१६ जनाले गराए परिक्षण
सिमराः सिमरा महिला बचत तथा ऋण सहकारी संस्थाद्धारा आयोजित स्तन तथा पाठेघरसम्बन्धी परिक्षण शिविरमा दुई सय भन्दा बढी महिलाले स्तन तथा पाठेघरसम्बन्धी समस्याको जाँच गराएका छन् ।
११५औं नारी दिवसको अवसरमा शुक्रवारदेखि संस्थाको कार्यालयमा आयोजित दुई दिने शिविरको पहिलो दिन दुई सय १६ जना महिलाले स्तन तथा पाठेघरको जाँच गराएका हुन् । नेशनल हस्पिटल एण्ड क्यान्सर सेन्टरकी स्त्री रोग तथा क्यान्सर रोग विशेषज्ञ डा. सौजन्य कर्माचार्य र डा. स्नेहा जोशीले महिलाहरुको जाँच गरेका थिए ।
सिमरा महिला साकोससंगको सहकार्यमा शिविर संचालन गर्न अस्पतालबाट ११ जनाको चिकित्सक टोली सिमरा आएको छ । टोलीले शनिबार पनि शिविरमा आउने महिलाको स्तन तथा पाठेघरको जाँच गर्दै परामर्श दिने सिमरा महिला साकोसकी सचिव गिता शर्माले जानकारी दिईन् ।
यसअघि शिविरको उद्घाटन जीतपुरसिमरा उपमहानगरपालिकाका नगर प्रमुख राजन पौडेलले गरेका थिए । उद्घाटन समारोहमा उपमहानगरपालिकाका नगर उपप्रमुख भोलाप्रसाद अधिकारी, ईलाका प्रहरी कार्यालय सिमराकी प्रहरी नायब उपरीक्षक सुभद्रा लामा वाइवा, जीतपुरसिमरा २ का वडाध्यक्ष धनबहादुर श्रेष्ठ, नेशनल हस्पिटल एण्ड क्यान्सर सेन्टरका निर्देशक श्यामकृष्ण जोशी, संस्थाको संस्थापक अध्यक्ष अनिता लम्साल अधिकारी, उपाध्यक्ष भिमादेवी शर्मा, लेखा सुपरीवेक्षण समिति संयोजक उर्मिला सापकोटालगायतको उपस्थिती रहेको थियो ।
संस्थाकी अध्यक्ष मुना खरेलको अध्यक्षतामा सम्पन्न कार्यक्रममा संस्थाले प्रहरी नायब उपरीक्षक वाइवालाई सम्मान गरेको थियो । कार्यक्रमको सहजीकरण सचिव शर्माले गरेकी थिईन् ।
