संविधानमाथि छेडखानी गरेर देशलाई गृह युद्धतर्फ लैजाने प्रयास भईरहेको छः प्रचण्ड
सिमराः नेकपा माओवादी केन्द्रका अध्यक्ष एवम् पूर्वप्रधानमन्त्री पुष्पकमल दहाल ‘प्रचण्ड’ ले संविधान र गणतन्त्रलाई छेडखानी नगर्न चेतावनी दिएका छन् ।
तराई मधेस जागरण अभियानलाई निरन्तरता दिन बारा आउने क्रममा बुधवार साँझ सिमरामा आयोजित सभालाई सम्बोधन गर्दै प्रचण्डले बृहत शान्तिसम्झौता पछि आएको संविधान र गणतन्त्रलाई छेडखानी नगर्न चेतावनी दिए ।
संविधान र गणतन्त्रमाथि मात्रै नभएर यसको अंगको रुपमा रहेको शान्ति सम्झौतामाथि समेत छेडखानी हुने भन्दै प्रचण्डले देशलाई पुनः गृहयुद्धतर्फ धकेल्ने प्रयास भईरहेको आरोप लगाए ।
‘संविधान र गणतन्त्रमाथि मात्रै होईन् शान्ति सम्झौतामाथि समेत छेडखानी गर्ने काम भईरहेको छ’ प्रचण्डले भने ‘देशलाई पुनः गृहयुद्धतर्फ धकेल्ने षड्यन्त्र भईरहेको छ ।’ शान्ति सम्झौताका अर्का हस्ताक्षरकर्ता गिरिजाप्रसाद कोइराला जिवित नरहेकाले त्यसको संरक्षण गर्ने जिम्मेवारी समेत आफूमा रहेको प्रचण्डले दावी गरे ।
संविधानलाई विकास आवश्यक रहेको र विकास गर्न सकिने भएपनि पछाडी भने फर्काउन नसकिने बताए । उनले संविधानलाई पछाडी फर्काउने भन्दा विकास गरेर अघि बढाउन जरुरी रहेको बताएका छन् ।
