मधेस प्रदेशका अस्पतालहरुमा चिकित्सकको तलब भुक्तानी नहुँदा स्वास्थ्य सेवा ठप्प
सिमराः मधेस प्रदेशमा चिकित्सक र स्वास्थ्यकर्मीको तलब भुक्तानी नहुँदा स्वास्थ्य सेवा प्रभावित भएको छ ।
नेपाल चिकित्सक संघ मधेस प्रदेश कमिटीले आकस्मिक बाहेकका सम्पूर्ण स्वास्थ्य सेवा चैत्र २१ र २२ गते बन्द गर्ने घोषणा गरेको छ ।
संघले मधेस प्रदेश सरकारलाई ७२ घण्टाभित्र चिकित्सक तथा स्वास्थ्यकर्मीको बाँकी तलब भुक्तानी गर्न अल्टिमेटम दिएको थियो । सरकारको बेवास्ताका कारण प्रादेशिक अस्पताललगायत सम्पूर्ण स्वास्थ्य संस्थामा आकस्मिक सेवाबाहेक अन्य सेवा दुई दिनका लागी बन्द गरिने संघका अध्यक्ष डा. निरज कुमार सिंहले जारी गरेको विज्ञप्तिमा उल्लेख छ ।
मधेस प्रदेशका विभिन्न अस्पताल र स्वास्थ्य संस्थामा कार्यरत चिकित्सक र स्वास्थ्यकर्मीहरूले ६ महिनादेखि तलब नपाएको गुनासो गरेका छन् ।
संघले मधेस प्रदेश सरकारलाई ७२ घण्टाभित्र समाधान नगरे थप आन्दोलनका कार्यक्रम घोषणा गर्ने चेतावनी समेत दिएको छ । संघका अध्यक्ष डा. सिंहले बारम्बार ध्यानाकर्षण गराउँदा पनि सरकारले बेवास्ता गरेको बताउँदै आन्दोलनका कार्यक्रमलाई निरन्तरता दिने जनाएका छन् ।
स्वास्थ्य सेवा बन्द भएसँगै मधेस प्रदेशका बिरामीहरूले आकस्मिक सेवा बाहेक अन्य स्वास्थ्य सेवा नपाउने स्थिति सिर्जना भएको छ । सर्वसाधारणले यस समस्याको तत्काल समाधान गर्न सरकारलाई आग्रह गरेका छन् ।
