डाँका समूहसंग भिडेका शाही ‘महिनाको उत्कृष्ट प्रहरी’
सिमराः जीतपुरस्थित ईलाका प्रहरी कार्यालयका ईन्चार्ज प्रहरी बरिष्ठ नायब निरीक्षक कलमबहादुर शाही भदौ महिनाको उत्कृष्ट प्रहरी घोषित भएका छन् ।
जीतपुरसिमरा २३ भलुहीस्थित एरोटेक प्रालीमा लुटपाट गर्न हातहतियारसहित पसेका डाँकाको समूहलाई नियन्त्रणमा लिन सफल शाहीलाई जिल्ला प्रहरी कार्यालय बाराले उत्कृष्ट प्रहरी घोषित गरेको हो ।
हातहतियारसहित उद्योग पसेका डाँकाको समूहलाई नियन्त्रणमा लिने क्रममा दोहोरो झडप समेत भएको थियो । झडप हुँदा टाउकोमा चोट लागेको अवस्थामा शाहीले दुई जना डाँकालाई नियन्त्रणमा लिन सफल भएका थिए ।
झडपका क्रममा दुवै पक्षबाट हवाई फायर समेत भएको थियो । प्रहरीले पक्राउ परेका डाँकाको बयानका आधारमा अन्यलाई समेत नियन्त्रणमा लिन सफल भएको थियो ।
डाँकाको समूहलाई नियन्त्रणमा लिएर उद्योग लुटपाट हुन जोगाएको भन्दै शाहीलाई बाराका प्रहरी उपरीक्षक होबिन्द्र बोगटीले प्रशंसापत्रसहित सम्मान गरेका थिए ।
