दुधौरा रमाइलो मेला माघ १ गतेदेखि सुरु हुने
सिमराः दुधौरा रमाईलो मेला माघ १ गतेदेखि सुरु हुने भएको छ । जीतपुरसिमरा उपमहानगरपालिका १४ स्थित दुधौरा खोलामा मेला सुरु हुन लागेको हो ।
मेलामा स्थानीय व्यवसाय प्रवर्द्धनका लागि व्यवसायिक स्टल राखिनुका साथै मनोरञ्जनका लागि सांगीतिक कार्यक्रम हुने आयोजकले जनाएको छ । लिड इन्टरटेन्टमेन्ट एण्ड एड्भरटाईजिङले आयोजना गर्न लागेको मेलालाई स्थानीय स्तरबाट युवा समाज डुमरवानाले सहआयोजकको भूमिकामा रहेर सहयोग गर्ने भएको छ ।
मेलामा स्थानीय उत्पादन, परिकारसहित ५० स्टल व्यवसायिक स्टल रहनुका साथै मुख्य आकर्षणको रुपमासेल्फी जोन राखिने व्यवस्थापक शिव घलानले जानकारी दिए । मेलामा बालबालिकाका लागि बाल उद्यान समेत राखिने भएको छ ।
माघ १३ गतेसम्म आयोजना हुने मेलामा राष्ट्रिय स्तरका कलाकारका साथै स्थानीय प्रतिभालाई उजागर गर्न सांगीतिक कार्यक्रमको आयोजना हुनेछ । आयोजकका अनुसार मेलामा प्रमोद खरेल, मिस्टर डी, पशुपति शर्मा, प्रकाश सपुत, रचना रिमाल, अस्मिता अधिकारी, ज्योती मगरसहित ५० जनाभन्दा बढी कलाकारको प्रस्तुती रहने लिड इन्टरटेन्टमेन्ट एण्ड एड्भरटाईजिङका अध्यक्ष बिमल खड्गीले जानकारी दिएका छन् ।
मेलाको व्यवस्थापनका लागि जीतपुरसिमरा उपमहानगरपालिका वडा नं. १४ ले सहयोग गर्ने बताइएको छ । व्यवस्थितरुपमा मेला सम्पन्न गर्नका लागि सवारी पार्किङ, सिसिटीभी क्यामराबाट निगरानी, सुरक्षा गार्डको व्यस्थापन गरिने आयोजकले जनाएको छ ।
