वडा कार्यालयद्धारा फूटवल खेलाडीलाई खेलकुद सामाग्री वितरण
सिमराः जीतपुरसिमरा उपमहानगरपालिका वडा नं. ५ को कार्यालयले शनिवार खेलाडीलाई खेलकुद सामाग्री वितरण गरेको छ । वडा कार्यालयले वडा स्तरीय बजेटबाट बकुलिया र भवानीपुरका खेलाडीलाई वडा कार्यालयले जुत्ता, जुराफ, जर्सी, ग्लभ्स, फूटवललगायतको सामाग्री वितरण गरेको हो ।
वडाअध्यक्ष दीपेन्द्र चौधरीले ४० जोडी जुत्ता, जुराफ र लेग गार्ड, २२ सेट जर्सी, २० थान फूटवल, ६ थान ग्लभ्स, चार थान चेन्जिङ बोर्डलगायतका सामाग्री खेलाडीलाई हस्तान्तरण गरेका थिए । अध्यक्ष चौधरीले क्लबका कप्तान राम चौधरी र राम अयोध्याचौधरीलाई सामाग्री हस्तान्तरण गरेका हुन् ।
सामाग्री हस्तान्तरण गर्दै वडाध्यक्ष चौधरीले वडाभित्र खेलको विकासका लागि आफूले निरन्तर सहयोग गर्ने बताएका छन् । कार्यक्रममा भवानीपुर जीतपुर गाविसका पूर्वअध्यक्ष रमनप्रसाद चौधरी, पूर्वउपाध्यक्ष डमरु कामी, वडासदस्य इश्वर चौधरी, इन्दल हजारा, समाजसेवी कृष्णप्रसाद चौधरी, सुरेश चौधरी, बारा जिल्ला फूटवल संघका उपाध्यक्ष घनश्याम चौधरीलगायतको सहभागिता रहेको वडाध्यक्ष चौधरीले जानकारी दिए ।
