जीतपुरमा जिल्ला स्तरीय कराँते प्रतियोगिता हुने
सिमराः बाराको जीतपुरमा जिल्ला स्तरीय कराँते प्रतियोगिता हुने भएको छ । नेपाल सितोरियो कराँते जीतपुर डोजो शाखाको आयोजनामा फाल्गनु ११ गतेदेखि १३ गतेसम्म प्रतियोगिता हुन लागेको हो ।
प्रतियोगितामा सिमरा, जीतपुर, कलैया, अमलेखगंज, रमौली र छातापिपरास्थित डोजोले सहभागिता जनाउनेछन् । आयोजकका अनुसार प्रतियोगितामा तीन सय भन्दा बढी खेलाडीको सहभागिता रहनेछ ।
जीतपुरस्थित शान्ति टोल खेल मैदानमा हुने प्रतियोगितामा प्रथम हुने टिमले १५ हजार, दोस्रो हुनेले १० हजार र तेस्रो हुनेले पाँच हजार नगद प्राप्त गर्ने आयोजक डोजो शाखाका संयोजक मनोजकुमार साहले जानकारी दिएका छन् ।
प्रतियोगितामा जीतपुरसिमरा उपमहानगरपालिका, जीतपुरसिमरा वडा नं. ७, बाबा हार्डवेयर, आरम्भ ट्रेडिङ, राज स्क्रिन प्रिन्टिङलगायतको सहयोग रहेको साहले जानकारी दिए । साहको अध्यक्षतामा सम्पन्न पत्रकार सम्मलेनमा जीतपुरका स्थानीय घनश्याम गिरी, कराते प्रशिक्षक सानु पटेल, श्रीराम साहलगायतको उपस्थिती रहेको थियो ।
