कलैया टी–२० मेयर कपः उपाधीका लागी वीरगन्ज र मकवानपुर भिड्दै
सिमराः कलैयामा जारी टी–२० मेयर कप क्रिकेट प्रतियोगिताको उपाधीका लागी शनिवार वीरगन्ज र मकवानपुरबीच प्रतिस्पर्धा हुदैछ । दुई टिमबीचको फाइनल भिडन्त बिहान ११ बजेदेखि सुरु हुनेछ ।
वीरगन्जले भारतको मोतिहारी र मकवानपुरले आयोजक कलैया क्रिकेट क्लबलाई सेमिफाइलनमा पराजित गर्दै उपाधी भिडन्त पक्का गरेका हुन् ।
सिद्धेश्वर खेल मैदानमा भएको पहिलो सेमिफाइनलमा वीरगन्जले मोतिहारीलाई १० रनले पराजित गरेको हो । टस जितेर पहिले ब्याटिङ रोजेको वीरगन्जले निर्धारित २० ओभरमा आठ विकेट गुमाउदै एक सय ४९ रन जोडेको थियो ।
एक सय ५० रनको लक्ष्य पछ्याउन जवाफी ब्याटिङ उत्रिएको मोतिहारीले २० ओभरमा आठ विकेट गुमाउदै एक सय ३९ रन बनायो । वीरगन्जका सफवन अलि खेलको म्यान अफ दि म्याच घोषित भएका थिए ।
यसैगरी दोस्रो सेमिफाइनल खेलमा मकवानपुरले कलैयालाई ३७ रनले पराजित गरेको हो । टस जितेर पहिले ब्याटिङ गरेको मकवानपुरले २० ओभरमा आठ विकेट गुमाउदै एक सय ९७ रन जोडेको थियो । मकवानपुरका शुभ कंसकारले ५७ बलमा एक सय २३ रन बनाएका थिए ।
जवाफी ब्याटिङमा उत्रिएको कलैया एक सय ६० रनमा अलआउट भयो । सतकीय पाली खेलेका मकवानपुरका शुभ खेलको म्यान अफ दि म्याच घोषित भए ।
